面對經濟衰退 如何保護自己嘅荷包?

博客 18:15 2020/02/14

分享:

面對經濟衰退 如何保護自己嘅荷包?

香港經歷持續半年有多嘅反修例風波後,𠵱家加埋新冠肺炎(俗稱武漢肺炎)疫情,令到本港經濟雪上加霜。政府早前已經宣布香港進入技術性衰退,而失業率會進一步上升,香港會計師公會更預計港府係2019/20財政年度會錄到181億元財赤,香港步入經濟衰退已亮起燈了!

【財政預算案】預算案公布前 會計師公會料港府錄181億財赤

當經濟衰退來臨,又要如何保護自己嘅荷包?

基本上,節省開支會係不能避免,不必要嘅開支就要Cut或縮減,節省到嘅就用嚟支付必要開支。雖然未必所有項目嘅支出都可以立即減少,但都係一個重新檢視你喺生活上嘅支出清單嘅機會。

盡量避免借貸或碌卡透支去支付支出,假如個人理財不善或者面臨失業,還唔到息同本金,債務隨時愈滾愈大。

第二,伴隨住經濟衰退來臨嘅係失業潮,最近已經有報道多間零售、飲食、旅遊業嘅公司已經要求員工八折支薪、放無薪假,甚至係裁員等,但如果疫情之後無改善嘅話,失業潮應該會擴散到其他行業。香港經濟同中國經濟關連度高,中國經濟不景時,香港好難避免。

無工返、無收入的確係好徬徨,因此你必須要有一筆緊急資金,用以支付你每月日常必要支出,最好資金數目係足夠撐到3至6個月日常開支。如果你𠵱家無足夠呢筆資金,好即刻執行第一步同第二步喇!

第三,好即刻更新你份CV,當你被炒,都可以快人一步Send CV出去見工,預先準備好過到時先準備。你亦都可以考慮增加不同嘅收入渠道,例如出售家中唔用嘅物品、做Part time等去增加現金流。

最後,通常喺經濟衰退下,投資市場風險都會增加,如果有做開投資,你亦要根據你嘅風險承受能力,調整投資組合,最好避免過度投資,手頭上要保持適量嘅現金,亦可以考慮喺緊急關頭用作補充緊急資金。

不少人會買港股收息,用作增加被動收入,但中港企喺經濟衰退下,企業收入會大減,亦未必可以保證派息,當Cut派息,通常股價會受挫。因此,積臣建議多元化分散投資,最好分散投資環球市場,唔好剩買中國、香港股票,因為中國同香港係今次疫情損失係最大,同時投資比例亦要增加固定收益產品比例。

【延伸閱讀】經濟衰退期勿亂撈底 你要知的5個投資理財策略

最後,積臣希望疫情盡快過去,願世界安好!

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版