想用WeChat Pay買機上免稅品 要先過到信用審查?

博客 16:56 2020/02/04

分享:

想用WeChat Pay買機上免稅品 要先過到信用審查?

大家都知道喺內地,支付寶同微信支付經已係Payment default,居民好多時已經唔會再帶錢出街,而信用卡又唔普及,咁就令到所有喺飛機上面嘅消費變得好困難喇。

【延伸閱讀】AlipayHK在全國通用是邁向國際的重要一步?

沒有網絡,便沒有QR Code Payment

點解好困難呢,因為喺正常情況下所有QR Code Payment都需要網絡連綫。

QR Code Payment有兩種,分別係:1)客戶主動去掃商戶的「靜態二維碼」付款;2)商戶主動去掃客戶的「動態二維碼」收款。

如果係前者「客戶主動去掃商戶的『靜態二維碼』付款」的話,咁客戶的手機當然需要連接網絡,因為商戶嗰個QR Code只係一個收款地址,甚至可以只係一張卡紙喇,你唔駁上網,唔通希望張卡紙駁上網?

如果係後者「商戶主動去掃客戶的『動態二維碼』收款」的話,客戶都需要網絡去生成一個「有時效」嘅「動態二維碼」。咁點解唔Fix死一個QR Code,要次次都重新連綫去生一個新嘅呢?因為始終QR Code係無加密嘅,求其一個Reader都可以讀取QR code,其實同大家平時嗰啲URL QR Code係無分別嘅。

如果個收款二維碼唔係不停咁變,咁一畀人偷咗咁就即係成個戶口送上架喇。

但係就算中國啲4G、5G幾勁都好啦,偏偏飛機上面就係無網絡,除咗因為航空公司基於安全考慮唔會畀你接駁Network之外,只要你高於10,000呎就根本乜G都唔會收到,所以全世界飛機上嘅交易都係用現金或者信用卡。

但係朕就係只有手機嘛。

點解信用卡又得呢?

或者大家會問,手機付款唔得,咁點解信用卡得呢?

事實係好多時信用卡都唔係即時交易,而係喺空中先將交易儲存落嚟,等飛機降落之後先會將數據送出完成交易;仲有一個方法就係透過佢哋內部嘅衛星系統去傳達訊號(無錯,你講唔到電話,唔代表航空公司係飛機上講唔到電話嘛! ),但一般嚟講都會用前者,即係儲存交易嚟處理飛機上嘅消費,原因係成本比較低。

【延伸閱讀】渣打同Trip.com合作推優惠 與虛擬銀行有關?

甚麼都是假,實名認證就OK了

微信喺2019年年中就宣布推出「微信機上付」,畀乘客喺飛機享用「先享後付」嘅離綫付款服務,目前只適用於春秋航空嘅內陸航班。

只要你透過進入「春秋航空」小程序,經實名認證後喺「個人中心」申請「微信機上付」,開通之後就毋須出示付款碼,也可先行喺飛機上面「先享後付」,上限為200元人民幣。

不過呢度有一個條件,就係你嘅微信支付分必須要喺550以上先可以申請。

微信已經成為一個信用評級機構

其實你喺使用微信服務嘅時候,你喺網上嘅一舉一動,已經組成緊你個人信用檔案,可以判定你到底係咪一個信用可靠嘅人。

睇咗啲內地網民嘅意見,就有人推算係根據你嘅消費習慣、同埋你過往嘅借錢同還款紀錄,例如有無遲還款或者係唔記得畀錢等等,去判斷你到底有幾誠實可信,至於當中Exactly用啲咩原則或者係規則去定你嘅信用分數,呢個就係Black box喇。

雖然暫時就只有春秋航空嘅內陸機支援,但下一步會推展去到中港機都唔出奇,如果飛機上係要求畀人民幣,而你無人民幣就又唔想用港幣信用卡畀錢,但你嘅內地版微信又實名認證咗,再加埋信用分又高於550的話,微信支付就可能係你一個新選擇。

但諗深一層,原來以後大家嘅消費或者係日常嘅行為,都係會比呢啲信用評級限制,而呢個仲要只係一間So called民營企業,喂喂,政府都未有咁暴力喎。

【延伸閱讀】大數據時代!網上Click幾下比入息證明更能左右貸款申請?

信用評級在內地已是平常事

其實呢樣嘢喺內地亦都唔係話有啲咩新奇,除咗呢啲私人財務機構嘅信用評估之外,中央銀行亦都建立咗一套財務信用評估系統,去評估每一個市民喺財務上嘅信用評分。

咁中央要建構一個咁樣嘅信用評級平台,啲資料到底係邊度嚟?中央又唔會主動借錢畀你嘅,咁到底埋微信有冇貢獻佢哋嘅資料比國家就不得而知啦。

而事實上財務信用評級亦都唔係咩可怕事嚟嘅,因為銀行機構都會根據你嘅財務記錄對你嘅信用進行評級,例如香港嘅銀行就一齊Join咗TransUnion嘅信用資料庫。

中央就將呢個概念擴張開去,早喺2018年就有報道過全國正透過2億個鏡頭進行「社會信用評級」,並將喺2020年全面實施。既然Unstructured嘅「日常行為」都可以評分,Structured嘅「財務」狀況當然可以評分。

呢個信用評分就唔單止影響你喺飛機上購物消費嘅行為啦,高分可能會令你獲得更低息的貸款、排名較高的大學,低分更可能會限制你日常嘅活動、成為公務員、甚至你同家人嘅教育同外遊嘅人身自由等等。

Black Mirror又點止喺飛機上面出現呢?

咁回歸返主題,微信既用信貸評分去決定你可以使用嘅服務,其實都係符合咗中央的政策方向,係中央社會信用評級嘅一個縮影!而且呢一個服務嘅模式更加可能會繼續擴張。

極端啲講,如果話日後去到去一啲高級餐廳都要經過信用評級嘅系統,咁你又會唔會接受到呢?

 

【文章來源:華田銀行;已獲授權轉載。原題:銀行閑談 (73) — 想喺飛機上面用WeChat Pay,過到信用審查先啦。】

【關於作者】

本文由「華田銀行」研究員P Chan所撰寫。

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版