【手機支付】Visa、Mastercard進軍中國唔容易 手機支付先係最大阻力

博客 19:09 2020/01/17

分享:

Visa、Mastercard進軍中國唔容易 手機支付先係最大阻力

持續差唔多2年嘅中美貿易戰喺今星期終於有新進展,中美雙方簽署第一階段協議,其中有項協議係中國同意接受美國金融機構在中國申請許可證,坊間解讀美國兩大信用卡機構Visa、Mastercard終於可以進軍中國,預期中國信用卡市場將會掀起巨浪。

【中美貿易協議】中國開綠燈 美國信用卡有望闖中國市場

Visa、Mastercard信用卡幾乎全球都可以使用,但係中國呢個14億市場就缺少一席位,有留意新聞都知,中國政府一直限制外資信用卡機構喺中國市場發卡,因此Visa、Mastercard一直入唔到中國。於是乎中國信用卡市場幾乎都係由銀聯壟斷。雖然今次Visa、Mastercard終於可以進軍中國,但佢哋最大對手唔係銀聯,而係兩大手機支付孖寶──微信支付同支付寶。

中國手機支付盛行

據德勤中國《2018中國移動消費者調研》,中國內地係手機支付使用最廣泛嘅國家,超過9成中國用家係使用手機支付。有去過中國大陸嘅,都唔難察覺中國用家日常係用手機掃QR code畀錢,當要過數畀人都唔使用銀行ATM、ebanking,就直接係手機錢包度撳。對中國用戶嚟講,銀行卡、信用卡都唔係必須帶出街嘅物品,反而佢哋係無手機跟身先係最唔方便。

唔同香港,中國用家已經跳過實體卡年代,直接進入到無卡嘅手機支付年代,銀聯雖然係中國信用卡市場龍頭,但睇見微信支付同支付寶發展強勁,都發展自己一套手機支付系統──雲閃付,但結果係動搖唔到微信支付同支付寶嘅手機支付地位,據標準普爾旗下Kagan喺去年7月嘅調查,有86%用戶均有使用微信支付同支付寶,僅45%受訪者表示有使用銀聯嘅手機支付服務。

手機錢包生態圈

點解動搖唔到?呢個point除咗銀聯要面對外,Visa、Mastercard進入中國後一樣都要面對,就係微信支付同支付寶嘅生態圈。微信支付同支付寶唔止只用係消費支付同手機轉帳,你打開個手機錢包,你係會見到好多服務,基本上係同你嘅日常生活連結埋一齊,你可以透過手機錢包交水、電、電話費外,亦可以使用多種第三方服務,例如買火車飛、call的士、叫外賣、網購等,簡單講一個App已經可以做齊生活所需,非常方便,唔需要你download N咁多個Apps,再逐個App搞設定。

微信支付錢包可使用多種服務。

微信支付錢包可使用多種服務。

基本上,中國用家已經習慣咗呢種生態圈,短期內都唔見到有咩可以代替到佢哋兩個。因此,積臣對於Visa、Mastercard往後喺中國嘅發展唔感到樂觀。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣 積財有計

欄名 : 積財有計

緊貼財經時事新聞分析,讚好hket Facebook 專版