巴菲特送與別不同嘅聖誕禮物 其實係一堂理財課

博客 17:22 2020/01/03

分享:

巴菲特送與別不同嘅聖誕禮物 其實係一堂理財課

剛過去嘅聖誕節,相信唔少人都收到聖誕禮物。收到一份自己想要嘅禮物固然開心,不過,收到唔啱自己或對自己無用嘅禮物,掉咗佢唔係,再送畀人又唔係,所以年年都有人開post分享「最伏」聖誕禮物。不過,股神巴菲特(Warren Buffett)送嘅禮物絕對係你意想唔到。

聖誕禮物係送股票?

有報道就指,巴菲特嘅「前新抱」瑪麗(Mary Buffett)就曾透露過,以往巴菲特會送每名家人1萬美元現金作為聖誕禮物,但後來佢發現家人好快將啲錢洗晒,之後就唔送現金改送股票,巴菲特嘅家人可以選擇繼續持有股票或即刻沽出套現。有一年,瑪麗嘅家人收到嘅係價值約1萬美元嘅可口可樂公司股票。

好多人收到唔啱心水嘅聖誕禮物,都心想折現吧啦。但如果巴菲特送股票畀你,你又會唔會鍾意呢?唔熟投資嘅人,可能心諗你送呢啲嘢畀我做咩呢?唔食得,又唔可以兌換禮物,最可能會選擇即刻沽出套現買禮物。如果係你用嚟送畀另一半,唔知會唔會成為「十萬個激嬲另一半的理由」之一呢?

巴菲特的理財課

其實巴菲特係袋錢入你袋,現金禮物雖然可以滿足當刻物慾,享受當刻快樂,但就缺乏未來價值,就算你唔用、儲起佢,都好大機會跑輸通脹。巴菲特送股票,就係送有未來價值嘅禮物,呢筆股票喺未來有機會繼續升,咁你就可以享受當中財富增值。巴菲特重點持有嘅股票,好多都有息派,例如可口可樂公司。所以如果股神送可口可樂股票畀你你繼續持有,每年嘅派息都係唔錯嘅被動股息收入。睇返𠵱家巴郡每年都喺可口可樂公司收到幾億美元股息。所以收到呢份禮物係一舉兩得呢。

積臣認為,巴菲特此舉同時係傳授理財哲學。巴菲特曾講過,「若你不願持有1支股票10年,那連持有10分鐘,都不必考慮。」佢鼓勵投資者買入優質公司,並長期持有。瑪麗就醒喇,佢信任巴菲特嘅眼光,佢唔單止繼續持有巴菲特送嘅股票,而且仲會買入增持。

積臣喺度諗,如果父母每年送畀子女嘅聖誕節物或新年禮物係一手穩定增長嘅收息股,除咗收息仲有增長的話,當子女大咗要讀大學嗰時,呢筆股票嘅價值,隨時可以成為大學學費嘅資金。

話時話,畀着其他人做呢樣嘢,會唔會反而被話缺乏節日氣氛、無情趣、好Cheap呢?不過又咁諗,𠵱家買一手中電都要過4皮,其實又未必平得過一個手袋嘅。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版