2010-2019年係顛覆性嘅十年

博客 18:08 2019/12/27

分享:

2010-2019年係顛覆性嘅十年

仲有幾日2019年就完,2010至2019係21世紀第2個10年,學電視劇話齋,「人生有幾多個10年」。過去10年係一個顛覆性時代,科技改變世界,𠵱家人人手機不離身、社交媒體帳戶係每個人嘅網絡身份。過去10年喺投資世界戰鬥嘅各位,你有冇把握到呢啲機遇呢?

1. 科技巨頭崛起

喺科技不斷創新下,過去10年造就世界5大科技巨頭,佢哋產品同服務喺我哋嘅日常生活可謂無處不在,改變咗我地工作、購物、資訊交流和娛樂嘅方式。佢哋就係Facebook、Amazon、Apple、Netflix和Google,喺投資世界佢哋被稱為「FAANG」,5間公司總市值已超過3.9萬億美元(約30萬億港元)。如果10年前或者係佢哋IPO時有投資佢哋,回報都相當可觀。

FAANG的過去10年回報。

2. 虛擬貨幣冒起

虛擬貨幣中最注目就係Bitcoin,Bitcoin喺2009年發行,初時只係網絡forum上小眾話題,到之後更有分析指Bitcoin係泡沫,到𠵱家甚至開始同實體經濟連結。Bitcoin喺2013年首次於交易所買賣只係百幾蚊美金,但𠵱家已經超過7,000美元,而最早期有參與「掘礦」嘅人,擁有Bitcoin嘅成本更低。𠵱家Bitcoin總體市值已超過1,300億美元。

Bitcoin使用具突破性嘅區塊鏈技術,成為匿名與唯一嘅代名詞,之後到罪犯嘅工具,再從投機代名詞再變成便利支付嘅途經,不過Bitcoin始終擺脫唔到外界對佢支付嘅安全性疑慮。縱使係咁,虛擬貨幣如雨後春筍般出現,最近連Facebook都想搞Libra幣,分一杯羹。

Bitcoin價格波幅驚人。

3. 被動投資盛行

積臣過去都講過投資指數基金對好多普通投資者係最簡單做法,而ETF係最好被動投資選擇,一來收費低,二來目標可以追到大市回報,三來唔使主動揀股,於投資市場追漲殺跌。

研究機構ETFGI報告指,ETF資產規模由2010年不足2萬億美元,增至最新7萬億美元。美國銀行更預計,ETF管理嘅總體資產可能係2030年達到50萬億美元,可見未來被動投資只會更盛行。

【延伸閱讀】指數基金比主動基金更受歡迎? 巴菲特用「10年賭局」證明

4. 電動車落地

汽車依賴化石燃料啟動已經超過一個世紀,隨着經濟發展,愈多汽車就代表愈多空氣污染物排放,但隨着世界對環境保護嘅重視,零排放嘅電動汽車的誕生就顛覆咗傳統產業汽車。講起電動車製造商,領先市場嘅係Tesla,Tesla係2010年掛牌上市,由IPO價17美元飆升至今近430美元,升近25倍。

目前為止,雖然電動汽車喺汽車銷售上佔比唔高,但隨着各國政府未來積極推出環境保護政策,加上有國際知名汽車製造廠,例如平治、日產等投入更多產能去生產電動汽車,以及汽車電池及配套嘅不斷改善,亦意味着電動革命勢不可擋。

Tesla10年升近25倍。

踏入2020年,嚟緊嘅另一個10年,會有咩顛覆性產業?5G、AI、物聯網、太空旅遊?我哋除咗拭目以待,亦不要錯過嚟緊嘅大趨勢。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版