23歲每月投資$3,500  到61歲有$1,000萬係咪天方夜譚

博客 17:55 2019/11/29

分享:

23歲每月投資$3,500 到61歲有1千萬係天方夜譚?

近半年討論區最Hit嘅話題自然離唔開社會衝突事件,不過講到財經相關嘅Post,噚日積臣都見到一個幾Hit嘅,而個Post嘅討論話題正正係積臣之前提到嘅複息效應同指數投資。

有網民喺討論區出Post,建議年青人23歲讀完書,要開始投資,並每月將人工入面3,500蚊拎嚟做長綫價值投資,佢用投資美國信用卡公司Visa為例,平均每年有8%回報,持續月供情況下,到第39年,即係61歲嗰時,就計算到回報可達到1,083萬蚊。到時將呢筆錢keep住賺8%,年收入可達86萬蚊,即月收入7.2萬蚊。

就算61歲開始唔做嘢,即使唔做投資剩係每個月拎23,000蚊出嚟作生活費,你都要100歲先使得晒,都可以話係財務自由嘞。呢位巴打用Excel計晒每個歲數嘅回報總額,仲計算埋每年3%通脹嘅假設,都無話唔畀足心機了。積臣都要畀個Like呢位巴打。

有巴打建議年青人23歲讀完書出嚟做嘢,要每月拎$3,500開始投資。

不過佢個post就引嚟好多巴絲打留言負評。積臣感到有啲錯愕,今次積臣唔係想講樓主個case啱唔啱,只想總結一下留言。

1. 邊有可能累積1千萬?

數字唔呃人,一切都係呢位巴打基於以上數據而計到,當中道理就係複息效應威力,愈年輕開始投資,滾存效果愈好,積臣過往例子都有講到,而最重要係你要有持續投資習慣。

【延伸閱讀】每日少飲一杯咖啡 就可以變成有錢人?

另外,當你每月持續買入同一股票,亦可以食到平均成本法嘅好處,高位時會買少啲貨,市差時入多啲平貨,溝返平均成本。好多文章都有講好處,積臣唔重覆了。

【延伸閱讀】拆解月供股票的三大疑問

2. 回報8%係幻想?

最多巴打質疑係每年平均8%回報,話一有股災輸錢就有份。積臣認為投資股票係會經歷大起大跌時期,所以應睇長期回報,而唔係僅僅某年回報,巴菲特都講過,最理想投資期起碼要係10、20或30年。

有巴打就話,搵到篇文章,講美國標普500指數年接近做到呢個回報,要記住已經計埋美國幾次股災。又有人質疑,個市一定升㗎咩?其實呢種心態又太消極,當股市太高時,又驚爆,但低位時又覺得會繼續跌,一路估價位,就可能會不斷錯失機會,與其估估下,即刻做係咪先係最好選擇?

就算只係7%或6%回報,但最重要嘅係要帶出個道理:你年輕時唔投資,花天酒地用晒啲錢,老年只會不知所措。

【延伸閱讀】退休係嘆世界定捱世界? 你要知道的退休真相

3. 供個股會供死會?

積臣唔否定潛力股機會,但你要識落車止賺,如果唔係有機會變成滙豐咁,但你叫普通投資者去分析幾時落車,亦都要時間同心機。其實,巴菲特已經用10年時間同對冲基金經理打過賭,都間接證明咗作為被動投資嘅指數ETF喺一般情況下嘅表現未必會差得過主動式管理基金。

【延伸閱讀】指數基金比主動基金更受歡迎? 巴菲特用「10年賭局」證明

4. 臨退休股災點算?

當你臨退休前儲到一大嚿錢嘞,就要開始改以保守策略去投資,投資組合需要將部分錢轉去保守產品,但呢個又係另一話題了。

5. 退部署係講長遠

講咗咁耐,你會發現退休部署係講長遠,要好長時間先見到效果。Amazon創辦人貝索斯曾經問過巴菲特:你嘅投資理念非常簡單,點解大家唔直接複製你嘅做法?巴菲特直截了當答佢:「因為沒有人願意慢慢變富有。」真係直接一巴打落有份負評嘅巴打度。

最後,積臣想講,各位巴絲打其實唔使咁辛苦,《錢家有道》網站有計算機幫你計,方便過自己用excel㗎!

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版