YouTuber自爆公關災難 所謂「網絡紅人」好易變「唔紅」

博客 17:52 2019/11/22

分享:

Youtuber自爆公關災難 所謂「網絡紅人」好易變「唔紅」

YouTuber係近年新興的職業,望落好似好free、唔受束縛。最近,被視為香港第一代YouTuber嘅Ming仔就因為直播交代自己對持續數月反修例運動嘅睇法,被網民洗版式批評,繼而dislike佢,到今日睇返,佢Facebook fans由高峰近50萬大跌近一半。

YouTuber四大收入

未必好多人知YouTuber係點賺錢,另一知名Youtuber大J就曾經拍片爆料,YouTuber主要分為4大收入,分別係YouTube影片廣告收入、觀眾贊助、拍片幫品牌宣傳,同埋喺社交平台進行品牌宣傳,其中最大收入梗係拍片幫品牌宣傳同喺社交平台進行品牌宣傳。大J曾經年賺100萬,即係平均月入約9萬幾,已經算係犀利,但Ming仔就更加勁,自爆高峰時曾月賺25萬,後尾佢被經理人公司解約,每月收入銳減至5萬,但其實都高過香港好多打工仔。

【延伸閱讀】做YouTuber好好搵?大J爆YouTuber月入5萬不是夢

YouTuber一職好似好free咁,鍾意幾時開live就開live,鍾意幾時拍片就拍片,又唔使趕頭趕命返office,又唔使怕老闆「詐型」等,但睇真啲觀眾就係佢哋老闆,YouTuber拍片就係要討好觀眾,而且不斷構思新題材,點樣令到條片夠「爆」、吸睛,其實係好費「腦力」。但當觀眾一唔like你,佢哋就會離開,搵替代品,須知家下YouTuber多如繁星,觀眾係唔愁無嘢睇。

今時今日,YouTuber政治取態已經會影響觀眾忠誠度。專頁無fans likes未算最痛,最怕係有公司知你不受觀迎,搵你拍片宣傳只會引dislike,佢哋會開始遠離你,基本上呢個YouTuber品牌名譽已大跌。

YouTuber轉型係關鍵

其實唔少YouTuber都知道所謂「網絡紅人」終有一日「唔紅」,或甚至行業消失,唔少YouTuber已部署轉型,做幕後策劃,或者開公司,其實Ming仔已經撈過界,同電視台合作拍綜藝節目、電視劇集,甚至係執導拍電影,由小小電腦mon,搬上到公仔箱之餘,更搬到大熒幕,佢總算係分散咗風險,不過電腦mon、公仔箱同大熒幕嘅目標群眾雖然話唔同,佢哋對呢今次單嘢睇法未必完全一致,但風頭火勢,邊有公司敢救火,割席都嚟唔切喇!

今次Ming仔親身示範一次YouTuber如何自爆「關公災難」,畀其他YouTuber上咗一堂,YouTuber係要知道你目標群眾特性,唔識唔好亂嚟。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版