示威活動期間 乘搭「加價」紅Van有感

博客 17:23 2019/11/15

分享:

示威活動期間 乘搭「加價」紅Van有感

今星期示威活動嘅衝突更趨劇烈,幾乎18區都有示威,港九新界都有堵路情況。港九新界嘅主要陸路幹道都唔暢通,巴士停駛,港鐵因各種原因亦要停駛部份路綫,返工返學都難免有困難。

好多人以為無固定行車路綫嘅的士係救命符,以往打風期間即使的士「加價」,市民都會照畀照搭,不過今次縱使乘客願意加錢,唔少喺九龍嘅的士都唔願意過海,因為司機驚過咗海會過唔返對面海。積臣都明白嘅,港島多區成為衝突主要場地,如果過海隧道一block,港島真係會成為孤島。今次渡輪再次發揮作用,令到返工返學嘅人士都過到海,部分渡輪航綫更加密班次,而且唔加價,真係造福人群。

遇正紅Van加價

今星期三傍晚時份,觀塘發生衝突,觀塘站提早於晚上8點關閉,積臣啱啱好係觀塘站關閉前出到站。積臣出到站時,正係衝突完結無耐,警察正清理觀塘道嘅路障。觀塘道一被封,其實都好影響觀塘交通網絡。

觀塘有唔少紅Van綫,可說係全港最多紅Van綫的地區之一,巴士停唔到觀塘道,觀塘站又關閉,行車路綫不受限嘅紅Van成為救命車了。積臣搭嗰架紅Van係由觀塘市中心駛去觀塘北山上嘅,平時只係收5蚊,嗰日就加價至8蚊。一般嚟講,紅Van係無得用八達通卡畀錢,落車畀現金,如果加咗價,而司機無特別講,一般只會係司機車頭位置擺個新價錢牌,其實係唔易察覺。今次,唔少人到落車先知加咗價,就引起爭拗,但你又唔可以唔畀,因為你都完成旅程,而且好多人都係抱多一事不如少一事心態,「算喇!」。

紅Van不受運輸署監管

當然,梗有人錢照畀,心唔服,的士起碼喺上車時都會有個deal,但紅Van無。紅Van喺「大日子」加價唔係新鮮事,但喺呢啲「災難」日子加價,唔少人都唔服。紅Van行車路綫、班次同車資唔受運輸署監管,因此紅Van比其他公共交通工具更具彈性,某啲路段被block,佢哋就可以即時改道;某路綫多人搭唔夠車,可以即刻調動其他路綫補加班次;當然,佢地又可以隨時加價,特別係「大日子」。

唔少人質疑紅Van發「災難財」,係咪「濫收」車資,但紅Van係咁樣嘅框架下的確係可以咁做。對於部分乘客同經營者而言,「靈活」可能係紅Van嘅優點,所以紅Van有好有唔好。近年,紅Van數目不斷減少,好多新發展地區改由綠Van營運,綠Van係受運輸署監管,就咁睇,紅Van未必係運輸署要急切監管嘅行業。即使係咁,如果下次紅Van可以早啲發布消息話加價,至少可以減少爭拗情況先,唔like嘅人起碼可以選擇唔搭。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版