本港經濟進入技術性衰退 平民要點自保好?

博客 18:18 2019/11/08

分享:

本港經濟進入技術性衰退 平民要點自保好?

上兩期,積臣就講過香港或會進入滯漲年代。近日公布嘅第3季GDP數據,按年呈負增長2.9%,係自2009年以來,首次錄得按年跌幅,若按季度作比較,更已是連續兩季呈負數,由前季嘅-0.5%,顯著擴闊到上季的-3.2%。政府話香港已進入技術性衰退。

【上期文章】香港面臨滯脹年代?

經濟就話衰退,但第3季通脹率都超過3%,算係香港進入滯漲嘅迹象,第4季GDP亦唔見得會有大幅改善。經濟衰退除咗要節衣縮食,最怕係裁員減薪,好彩香港整體失業率仲係低,維持喺2.9%,算係全民就業情況,不過嚟緊係點好難估計,特別係零售、旅遊、飲食業面對嘅情況較嚴峻。

【延伸閱讀】陳茂波:本港經濟步入技術性衰退 暴力事件影響外商投資信心

上次積臣講到要點分配資產好。今次講下如果你真係touchwood唔加薪,甚至減薪,焗住要節衣縮食,積臣有啲貼士可以分享下。

建議專平買衫,或者專登係季尾清貨大減價時買,有啲服裝舖會將上年賣剩嘅貨尾拎返出嚟平賣。部分服裝連鎖店例如H&M,會響應環保,你捐出舊衫,佢就會送購物現金券,捐舊衫都可以慳錢。

有唔少人會上淘寶買平衫,如果你本身唔係好節制嘅人,就要小心變成網購成癮。

食佔咗港人日常消費入面一大部分,𠵱家出街食午飯閒閒哋都要40、50蚊。上班一族要慳錢,可以帶飯盒,不過人人家庭環境唔同,未必個個做到。

要出去食嘅話,又唔係無平飯選擇,連鎖店中較平就去可以去食米綫或食個炸雞桶飯,30幾蚊都可以食飽;近年連鎖點心舖,例如店名有個「包」字嗰啲都有平價飯,都只係約30蚊,都算係窮人恩物。另外,積臣建議可留意下食環署公眾街市嘅熟食中心,價錢平過街舖,而且份量算多,啱晒大食人士。

屋企有煮開飯嘅人,可以參考一啲長者嘅做法,佢哋唔會去屋企附近嘅領展街市買餸,因為真係貴,就跨區去啲平價街市買餸,並一次過買幾餐餸,多買多平。有人話長者有2蚊乘車優惠,扣返成本當然抵,不過積臣可以咁講,當領展街市買斤菜要12、13蚊時,平價街市只係8蚊兩斤,就算你唔係2蚊搭車,嗰小小車錢都抵畀喇。

交通費上係港人另一大支出。住得離返工地點遠嘅人士,當然要買公共交通工具嘅月票喇。近月,部分人會因為一啲原因而唔搭港鐵改搭巴士,我諗應該多咗人發覺同樣路程,巴士係平港鐵好多,有人話驚巴士塞車,積臣只能感慨「窮呀,預多啲時間出門口喇!」

另外,都可以善用信用卡幫八達通卡自動增值,賺取回贈,一樣可以積少成多。

預備應急資金

除了檢討日常支出,盡量減少不必要嘅開支,量入為出,亦要備有足夠嘅流動資金周轉,一般係要留有3至6個月應急資金應付生活開支,起碼被炒都未至於因為資金問題而會餓死先。

香港呢邊壞消息多多,另一邊中美貿易談判終見曙光,而且又傳中美會互撤關稅,如果成事,貿易戰對香港嘅影響應可以慢慢消退,到時應該可以對香港經濟打支強心針了!

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版