「地上最強股市」美股創新高 想搭順風車要點入場?

博客 17:52 2019/11/01

分享:

今年環球股票市場大升大跌,真係風聲鶴唳,首先中美貿易談判不斷拉扯,一時話好消息將至,一時又話兩邊「反枱」;年中又驚全球經濟步入衰退,美國債息一度「倒掛」(呢個指標代表美國進入經濟衰退機會大),第3季美國開始返減息周期;英國脫歐又未明朗化,𠵱家又拖到明年先決議。不過,正當香港股民愁雲慘霧時,隔個太平洋嘅美國股市正在創新高。

港美A股指數表現比較

今星期嘅10月28日,美國標普500指數再創52周新高,噚日收市報3037.56點。對於香港股民嚟講,熟悉港股多過美股同A股,正如積臣提到嘅上面因素影響,今年無論港股、美股、A股3地股市都經歷大起大跌,但3地股市恢復嘅程度都唔同,最實際就係比較吓表現︰

市場 年初至10月31日表現

過去5年表現

(截至10月31日)

香港恒指 4.11% 12.12%
美國標普500指數 21.17% 52.29%
中國上證指數 22.01% 21.69%

先睇年初至10月31日表現,上證指數同標普500指數旗鼓相當,分別係22.01%同21.17%,上證指數稍為領先;恒指就最差,只有4.11%。齋睇短期數據未必睇到市場強度,咁比較過去5年回報,標普500指數、上證指數及恒指分別係52.29%、21.69%、12.12%,簡單啲睇,每年平均回報則分別係10.46%、4.34%、2.42%。

美股可以不斷創新高,除了因為有唔少國際巨企、吸引環球資金等因素,更重要係喺過去眾多不明朗因素下,美國企業仍可以創造盈利。根據《華爾街日報》報道,截至10月31日,標普500成份股中約有75%公司嘅盈利係超出市場預期,公司盈利才係推動股票表現上升動力。大家有留意新聞都知道蘋果公司、Facebook、微軟等大型公司嘅盈利繼續增長中。

入場選擇

被網民奉為「地上最強」嘅美股,想搭順風車,但又唔識揀股,又無時間睇市,積臣不嬲建議最簡單就係買ETF。以追蹤標普500指數來講,香港上市嘅有領航標普五百ETF (03140) ,可以直接用港幣買,領航另有推出用人民幣同美金計價嘅標普500,但積臣就唔係幾buy;美國上市方面,最熱門嘅係SPDR S&P 500 ETF(代號︰SPY)同Vanguard 500 Index Fund(代號︰VOO),咁美股果邊當然要用美金買貨喇。

積臣就覺得直接開個美股戶口買美股ETF會比較好,點解?最重要就係收費因素。

收費方面,3140、SPY、VOO分別係0.18%、0.095%及0.03%,而當中最平係VOO,積臣首選係VOO,因收費已首先慳一筆,況且「股神」巴菲特都講過買收費低ETF喺多數情況下係最理想選擇。至於表現?其實美國兩隻標普500 ETF係非常貼近。

【延伸閱讀】指數基金比主動基金更受歡迎? 巴菲特用「10年賭局」證明

ETF 收費
領航標普五百ETF (03140) 0.18%
SPDR S&P 500 ETF(代號︰SPY) 0.095%
Vanguard 500 Index Fund(代號︰VOO) 0.03%

要注意嘅係,3140日均成交量偏低,今日都只係得100多萬港元成交,如果急於出貨,可能要捱較大買賣差價,而且呢隻ETF價格仍未跟隨標普500指數破頂。

最後,或者會人問買美股即係要唱美金,蝕滙率喎。其實港元同美元係聯繫滙率制度下,滙率波幅有限,起碼積臣敢講,3140同VOO個收費已經可以抵銷返滙率差價喇!

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版