香港面臨滯脹年代?

博客 17:36 2019/10/25

分享:

香港面臨滯脹年代?

因條例《逃犯條例》引起嘅政治風暴已持續4個多月,暫未見有平息跡象,加上中美貿易戰同環球經濟不穩等因素,本港旅遊、零售業嚴重受挫,港府預計今年GDP增長會放慢,最壞情況會係0增長。但積臣發現一個有趣現象,最新本港通脹率沒有減退情況,咁經濟衰退,但維持高通脹率,係咩玩法?積臣擔心香港可能面臨滯脹年代。

預測本年0增長

先睇一睇數據,商務及經濟發展局局長邱騰華最近喺電台節目表示,今年係近10年以嚟經濟形勢最差一年,預測經濟增長將由3%降至0。摩根士丹利睇得更淡,將今年香港GDP預測由-0.3%降至-0.8%。高盛亦將預測由1.5%降至0.2%。統計處下周將公布第3季GDP數據,到時就可知道香港不景氣程度。

【延伸閱讀】IMF下調今年香港經濟增長預測至0.3% 為亞洲最低

高通脹率

至於通脹率,近日統計處就公布最新數據,7至9月通脹率分別係3.2%、3.5%同3.2%。9月份錄得按年升幅的類別為食品(+13.1%)、住屋(+3.2%)、外出用膳(+2.1%)和交通(+2.1%)等。其中食品升得咁勁,主要由於內地供港豬肉價格急升,內地非洲豬瘟疫情嚴重,令豬肉價變得昂貴。港府亦將全年通脹率預測由之前2.5%加至2.6%。

內地非洲豬瘟疫情嚴重,令內地豬肉價急升。

【延伸閱讀】嚴選5大高息港元定存 跑贏本港通脹率

面臨滯脹

如果以上預測係真,香港將面臨通脹持續,但經濟增長放緩嘅滯脹年代。即係一方面可能出現裁員潮、企業停止招聘、人工福利唔加嘅情況,另一方面係物價繼續升,結果市民購買力下跌,到時市民生活只會更艱難。

香港係一個開放型城市,過往環球既貨幣寬鬆政策,令唔少熱錢流入香港,間接推高本港資產價格。政府最近放寬按揭成數,市場交投活躍返,之前積臣都有講到新措施只會更推高樓價。同時香港好多物品都要從外地輸入,所以很容易有輸入性通脹嘅情況。積臣當然希望自己係「燈神」(即係估計同真實結果相反),而且仲未有全年數據,最終結果仍有待觀察。

【延伸閱讀】放寬按保真係可以幫到市民上車?

萬一真係有滯脹點算?首先要減少消費,特別係非必須消費,留返多啲現金,將資金轉去同通帳掛鈎產品或者固定收益產品,例如債券、定期存款等,抵抗通帳,而且要盡快建立被動收入,起碼被人炒咗,都有收入支撐生活。但積臣就唔建議買本地企業收息喇,因為經濟唔好,企業盈利就會減少,好可能會減派息,一話減派息,股價又跌,到時連帳面都蝕埋錢喇!

最後,積臣都希望香港社會衝突盡快平息喇,等社會盡快康復。

【延伸閱讀】抗經濟衰退 10步管好個人財務

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版