【首置按揭】放寬按保真係可以幫到市民上車?

博客 16:00 2019/10/18

分享:

【首置按揭】新按揭措施真係可幫到市民上車?

今星期嘅全城話題,當然係新一份《施政報告》,今次行政長官林鄭月娥用左超過半個鐘講香港局勢同土地房屋政策,土地房屋政策佔報告30個段落,經濟發展只係得9個段落,但之前政府大鑼大鼓咁話,香港社會衡突持續落去,香港經濟捱唔住,會衰退。既然今次社會焦點係土地房屋政策,積臣都講下自己想法。

首期畀少啲 借錢借多啲

今次土地房屋政策最大回響唔係政府擬引用《土地收回條例》收回農地發展,而係政府放寬按揭保險計劃嘅按揭成數,簡單講即係畀首次置業準買家可以畀少啲首期,借多啲錢,容易啲上車。但積臣認為措施係有反效果,只會更推高樓價,往後市民係更難上車。

今次政府放寬按揭保險計劃嘅按揭成數,以往只有400萬元以下樓能借9成,今次擴至800萬元以下樓都借到9成,而8成按樓價上限提升至1,000萬元。行政長官就美其名話去幫一啲有一定收入,又有即時置業需要,收入足以供樓嘅人,可以有足夠彈性去買2手樓,唔只限局於一手樓。

【800萬首置】按證:新例只限已落成住宅 首置客未符壓測仍可敘造最高9成按揭

新措施幫到市民上車?

首先,放寬按揭保險計劃嘅按揭成數係咪真係幫到人上車?積臣覺得能力未到嘅人依然買唔起樓,就算你首期畀小咗而幫到你上車,但你按揭借嘅錢多咗,加埋利息同埋新措施嘅15%額外按揭保險保費,其實你每月還嘅錢係比之前多咗。唔好唔記得,仲有銀行壓測一關要過㗎。

另外,今時今日香港樓價已高到唔正常,400萬元以下樓係納米樓或好舊嘅樓。納米樓普遍指緊實用面積300呎以下,例如8月時馬鞍山薈朗229呎單位以398萬元易手。229呎兩夫婦住已經好勉強,如果有埋仔女,真係逼到唔舒服。

馬鞍山薈朗

新措施令800萬元以下樓都借到9成,準買家聽到唔使買400萬樓下納米樓,梗係𥄫實800萬元以下樓喇,800萬元以下樓需求太增,更會推高呢啲樓嘅價格。施政報告一公布,就即有業主封盤加價,嗱!市場反應最現實喇!當發展商推新樓時,見到同面積嘅2手樓都有咁靚嘅價,點會唔加價推出呀,有錢唔通唔搵咩?最終,全港樓市Up!Up!UP!到時上車唔會易,只會更難。

【首置按揭】一文看懂 按揭保險申請詳情

環球放水未停

唔好唔記得,美國已經進入減息周期(雖然聯儲局主席鮑威爾話係屬保險政策,防全球經濟放緩等風險),同時開始買返債(鮑威爾又只係話今次只買美國國債,係維持對超短期貸款利率的控制,並否認QE,不過市場唔係咁睇呢),其實係「變面版」QE。市場預期聯儲局喺今年餘下日子再減息一次。而歐洲上個月已減息,繼續實施負利率政策。所以全球放水日子只會繼續落去。熱錢太多,香港樓市泡沫只會更大。

覓地談何容易?

有好多人期望政府會搵多啲地,增大房屋供應,去壓低樓價,不過已有專家講到,引用《土地收回條例》收回農地發展,起碼要經過10幾年時間發展,先有穩定供應,加上政治阻力唔少。

講到呢到,積臣只嘆一句,香港樓已經係高風險產品。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版