渣打同Trip.com合作推優惠 與虛擬銀行有關?

博客 12:00 2019/10/16

分享:

我明白大部分讀者朋友一見到呢個ad,都只會講一句:「呢啲信用卡promotion成日都有啦,有咩咁特別?」

無錯,呢啲promotion真係成日都有,例如年頭就已經有個差唔多嘅優惠,不過今次係中記而唔係渣記,Trip.com背後母公司係Ctrip(即係攜程啦),中資配中資仲有gimmick啦,今次同英資嘅渣打合作有咩好講呢?聽我講、聽我講。

【延伸閱讀】滙豐取消最低結餘收費 原來背後話畀對手聽「螳臂擋車」

渣打同Ctrip係未婚夫妻關係喇

睇到呢張過大禮時候影嘅合照,唔知大家明未。

渣打喺今年4月頭成功攞到虛擬銀行(VB)牌照,仲整咗個名叫SC Digital Solutions Limited,不過佢並唔係孤身上咯,一個人自己同自己玩,而係夥拍咗近年積極搞大數據(The Club)、坐擁電視(Now、Viu)、地產(盈大地產)、固網(網上行)、流動網絡(SUN Mobile、CSL)、電子錢包(Tap&Go)嘅通訊娛樂巨擘PCCW+HKT,同埋其下坐擁Trip.com、Skyscanner同原生Ctrip.com喺NASDAQ上市嘅一站式旅遊平台攜程,咁件事就唔係只係「銀行」咁簡單喇。

所以話呢單渣打 X Trip.com嘅promotion唔係一般逢場作戲咁嘅一次性合作,反而有些少耍吓花槍嘅意味,話畀大家知「VB要嚟啦喂!」,仲留咗少少幻想空間畀大家,到底未來VB要點玩呢?

【延伸閱讀】【虛擬銀行】8間虛擬銀行背景你知道多少?

係咯,開銀行啫,搵呢兩個唔關事嘅嚟做乜?

答呢個問題之前,不如諗咗呢個問題先:「VB連實體分行都無,又無嘢係VB做得但係傳統銀行唔做得嘅,咁傳統銀行又有咩好驚呢?」

其實本身真係無嘢驚嘅,衰就衰在自己太多掣肘,太多legacy system,但係偏偏又唔可以砍掉重練,你唔可能同啲客講「我哋停個服務3個月,等我整靚仔晒佢再畀你用呀」咁嘛。

VB可怕之處就係用一個比較低嘅成本(「比較低」唔等於「平」ok?)由零開始砌過間bank,想點玩就點玩。用渣打呢個例子,砍掉重練再聯營HKT同Ctip咁就非常好玩喇。

個ecosystem先係最好玩嘅地方

唔知點玩?求其畀2個玩法大家:

  • 一站式旅遊服務

銀行+電訊+旅遊,即係話你可以一站式咁買機票、book酒店、book當地交通、買旅遊保、買外地電話卡、兌外幣,總之就肥水不流外人田啦。出發前仲可以推SMS畀你外遊提示、當地天氣、航班資訊,到咗當地有咩問題仲可以免費打番嚟香港嘅渣打/Ctrip(你用緊佢外地電訊服務嘛),總之就everything is seamless啦。

Big Brother is Watching You…

上面嗰個例子只係一個好白痴嘅use case,真正可怕之處係銀行會掌握到一啲佢以前好想知,但係無辦法知嘅data,呢個先係「真銀」嘛。

一個好簡單嘅例子,𠵱家有2個一模一樣嘅客向銀行申請緊私人貸款,兩個人唯一分別就係阿A成日去澳門、B就唔係,咁你批貸款畀邊個?好明顯B啦right,不過個問題係你點知先?

你同時係一個電訊商你就會知,個手機每個星期六日都由上環沿海路經屯門離開香港然後斷綫,傻嘅都知你去邊喇掛?

又再簡單啲,假如阿C一日到黑都上網上賭場,阿D就無嘅,咁你借錢畀邊個?不過個問題係你點知先?

你同時係一個ISP(Internet Service Provider)你就會知,以為開incognito mode就無事?傻豬嚟嘅,睇清楚先啦。

 

【文章來源:華田銀行;已獲授權轉載。原題:銀行閑談 (65) — 渣打與 trip.com 的這個優惠,再為虛擬銀行戰多添一點大戰氣】

【關於作者】
兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版