AlipayHK在全國通用是邁向國際的重要一步?

博客 16:47 2019/10/10

分享:

AlipayHK在全國通用是邁向國際的重要一步?

雖然只係短短3個月,深圳就由好多香港人嘅「潮人聖地」變成「世界最遙遠嘅距離」,所以亦都唔太關心到底AlipayHK即將喺內地全國通用有咩深重影響。不過作為一個稱職嘅財演(其實我都唔講財經嘅,或者可以叫銀演?),呢單嘢真係幾緊要架,聽我講聽我講。

現時AlipayHK的窘態

𠵱家大家就算喺香港有支付寶/微信都好,返到內地喺大部份情況下係用唔到嘅,除非大家幫襯一啲港資企業,例如Pizza Hut啦,所以大家最直接嘅方法就係帶定啲「人仔」,不過大家試過都知咁樣係超級唔受歡迎嘅。

【延伸閱讀】人行規定商家須收現金 遊客用現金無錢找又可以點?

唔想帶現金咁點呢?咁大家就要有個「內地版支付寶」,不過「download容易綁定難」,內地版支付寶只可以連繫內地戶口,咁你會話開番個內地戶口唔係好難啫?我就會話「開戶容易入錢難」,開戶有回鄉證基本上就可以,不過你點入錢呢?

由於大家唔喺內地賺錢,戶口個balance唔會識自動向上走,所以錢用晒就要入錢喇,但由於我國資本賬(Capital Account)係封閉嘅,跨境入錢其實相當麻煩,最合法最平嘅途徑就係攞現金番內地入,咪即係返番去第一個方法「帶人仔」咯……

Alipay下一浪會是甚麼?

雖然暫時並唔清楚可唔可以經AlipayHK用Visa/Master消費,又唔知道可唔可以用AlipayHK同內地支付寶做P2P,但就算只准連接港紙戶口、只係准做消費都已經不得之了。

港紙係自由流動嘅貨幣,港紙得、即係技術上美金都得,所以如果𠵱家開個AlipayUS連個美金戶口喺內地消費都只係政治問題多於經濟/技術問題。如果唔淨只可以做消費,仲可以做埋P2P的話,咁同人民幣(在中國境內)與外幣自由兌換無咩分別,咁當然我估佢會話「因為保安理由」而整番個daily cap嘅,呢啲嘢都係要等批准㗎啦。

【延伸閱讀】大數據時代!網上Click幾下比入息證明更能左右貸款申請?

馬雲的20億中國夢

最近馬雲正式退休,又有人再提起佢2017年喺杭州年會時嘅一番話:「今天從規模來講,它已經是全世界第21大經濟體。再過19年(2036年),我們希望能夠打造全世界第5大經濟體。而第5大經濟體,不是因為規模,而是責任,更是擔當。我們希望為全世界解決1億的就業機會,我們希望能夠服務20億的消費者,我們更希望能夠為1000萬家中小企業創造盈利的平台。」

暫時中國就只有14億人,呢刻用緊支付寶嘅就大概有7億唔到,咁點chok到20億user呢?

答案好簡單,向外走,全球有70億人,有30%人用阿里巴巴就係20億啦,所以阿里巴巴要喺美國上市,佢嘅野心亦從來唔只甘心做一家「中國企業」,做下一間Visa/Master,就係阿里巴巴成為全球第5大經濟體嘅利器。

AlipayHK喺內地自由行,就係好重要嘅一步喇。

 

【文章來源:華田銀行;已獲授權轉載。原題:銀行閑談 (64) — AlipayHK 將在全國通用的重大意義】

【關於作者】
兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版