移民?你諗清楚未

博客 17:44 2019/09/27

分享:

移民?你諗清楚未

最大型移民潮,在八十年代,中英談判時,富有人家及專業人士皆有嚴重「羊群心態」。大部分有需要好、受人影響好、「身份象徵」好,都湧去搞移民。

全球大小國家知道香港人心態,皆撲來搶移民錢。不少連地圖都見唔到的小國也搶埋一份,並許以特佳條件--俾錢搞掂,唔使住即有護照!一時間,有錢人個個由幾萬美元開始奉獻,揸到成手護照。

八五年,我肥碌亦曾移民,結果一星期就知「領嘢」,悶到發慌外,最重要,作為傳媒人,毫無用武之地。在香港打慣「英超」,難道屈在加拿大埠仔「踢膠波仔」?

同行不少人亦如此,個個一年內雞飛狗走回流香港,重新搏過。愈走得快,返來香港愈有世界(因不斷有人移走)。若唔走踎幾年就弊,一來專業技能脫節;二來,位置已被後浪坐晒。若要做昔日下屬的下屬,有幾多個啃得落呢?

講番近日香港,又有大批人揚言應否移民。

我肥碌多口忠告,切勿矇查查就連根拔,人移民你又移。首先,預先到目標城市最惡捱日子試住三幾個月(例如寒冬的加拿大),看看有無工做、活在那裏生命有甚麼意義、遇到困難如何解決、若後悔又可有回歸後路……移民,絕不可趁熱鬧!

【原文:移民不可「趁熱鬧」

撰文 : 曾智華

緊貼財經時事新聞分析,讚好hket Facebook 專版