【財務自由】你離財務自由有幾遠? 呢個網站簡單幫你計

博客 18:54 2019/09/20

分享:

你離財務自由有幾遠? 呢個網站簡單幫你計

近年興講「被動收入」、「財務自由」,簡單講,被動收入可以理解為係你正職工作外的收入,你唔使投入自己太多時間、精力都有錢自動入你荷包,財務自由即係你唔需要再為日常生活開支而要為錢工作嘅狀況。

財務自由呢個term,其實即係打工仔經常掛喺口邊「唔使DO」、坐定定有錢收之類嘅夢想,跟住自己可以投入時間、精力做自己鍾意做嘅嘢,唔使為錢而煩惱。喺Google你打退休計算機,搜尋結果林林總總,但積臣就唔多見有「財務自由計算機」。

最近,積臣就搵到個美國網站,可以幫你計算你離財富自由仲有幾遠。當然網站基本設定是以美國人的社會狀況同稅率設計,但佢有一個進階選項,可以調整通脹率、投資回報、稅率等,從而計出啱你𠵱家現況嘅數字。

網站計算方式分為「百分比」或「數字」來計算,積臣認為以「數字」方式係比較好計啲。

我以一個25歲、擁有10萬存款、年薪18萬,每個月可以儲到1000蚊嘅年輕人為例,個表好似下面張圖咁︰

以一個25歲,擁有10萬存款,年薪18萬蚊,每個月可以儲到1千蚊嘅年輕人為例。

喺右下角你會見到進階選項,click入去,你會見到更多項目。

撳更多選項,可以調整稅率、投資回報等項目。

1. 稅率(Tax Rate)︰香港以邊際稅率計算,第一層係2%,咁就以2%稅率為例;

2. 工資增長率(Wage Growth Rate)︰以每年加薪4%。

3. 投資回報率(Investment Growth Rate)︰以每年5%為例。

4. 通脹率(Inflation Rate)︰以香港2014至2018年期間平均2.74%通脹率為例。

5. 提款率(Drawdown Rate)︰即係你每年會從退休帳戶攞幾多錢出嚟用,用返網站建議4%為例。

6. 預計需要退休金(Income needed in Retirement)︰呢度可以留白,等網站幫你分析。

撳Summit之後,你就可以見到以下圖結果了,個結果好多juicy嘢睇,積臣睇重點,最右面個「Years until financial independence」個結果,喺假設以𠵱家儲蓄狀況,呢位後生仔要78年後先可以財務自由,何其悲慘……

假設每個月儲1千蚊,你要78年後先可以財務自由。

不過,改一改小小數據。結果又係點呢?如果將收入3成儲起,即每月平均儲4500蚊,個結果即刻勵志好多!呢位後生仔只要31年後,即56歲就可以財務自由了,係快咗22年!當然喇,你每月儲得愈多,可以達到財務自由嘅年齡更早喇!

但改為每個月儲4千5百蚊,31年後就可以財務自由。

【延伸閱讀】港人每月平均儲7500元 逾3成打工仔無儲蓄習慣

總括一下,每個人財務狀況唔同,上面個案只供參考,特別係每人嘅未來工資增長、稅率、提款率變會唔同嘅。但上面果個案無非都係指出提早理財、投資嘅重要性了吧!愈後生,愈早儲錢,再利用複利投資,滾存儲蓄,財務自己,「唔使DO」。並唔係日日係度祈求搏中六合彩、三T咁囉!

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版