【收息】定期存款外的選擇 券商「活期」彈性高諗得過

博客 17:12 2019/09/13

分享:

尋日歐洲央行宣布將利率從-0.4%進一步減到-0.5%,並且11月起再次啟動量化寬鬆計劃,每月購買200億歐元資產;同一時間,丹麥央行亦減息-0.1厘至-0.75%。其實呢啲新聞即係話俾我哋聽,量化寬鬆年代無離開過我哋。

低息年代持續

好多人問利率有負數咩?簡單咁去理解,負利率即係你放喺銀行啲存款係要畀利息銀行。假設銀行利率係-0.3%,你放1萬蚊喺銀行,一年之後,你要交30蚊畀銀行,即係你喺銀行嘅存款係會縮水。「嘩!放錢喺銀行收息就聽過,𠵱家銀行收我哋『息』,有無搞錯!」無他嘅,各個經濟區都想放水谷經濟。連之前兩年加息加到「嘭嘭聲」嘅美國,都開始減息,美國總統特朗普更發文話美國聯儲局應該學其他經濟區實施負利率政策。

幾年前香港同美國一樣係零息時代,首先你放喺銀行嘅存款係超低利息,部分銀行更加有最低結餘收費,你存款金額未達要求,你係要被收charge,即係變種「負利率」,好在各大銀行已經陸續豁免最低結餘收費。市場亦預計聯儲局今年餘下日子好大機會減息,如果香港跟減,低利息年代又來臨,高息定存仲會唔會持續係一個好問題。

定存外的選擇

積臣知道唔少人鍾意造定存,因為收益穩定。但積臣本人就唔鍾意喇,皆因好影響資金流動性,有啲高息定存條件要求多多,例如要某種戶口等級要求,或者要求大額存款等。

近年內地科技發展蓬勃,加上電子錢包流行,支付寶同微信支付都分別推出手機理財工具「餘額寶」同「理財通」,可以買到不同種類的理財基金,息率高於活期存款,甚至定存,入場費可低至1,000蚊,有啲基金可以即時提取,等錢使可以馬上離場。呢類理財產品係內地𠵱家好hit,吸引到唔少銀行存款流向呢到。

微信支付「理財通」。

香港雖然有支付寶同微信支付,但未見佢地係香港推出。不過,本港已有兩間證券行就率先仿傚,搶「頭啖湯」,其中一間有中資資金支持嘅推廣攻勢最強。佢個「現金寶」有貨幣基金、債券基金、股息基金等,息率普遍1%以上,基金認購費低至0.01蚊。認購方便,係手機APP全程做到,基金不設認購費、贖回費、轉換費,只收取約1%的管理費。

富途「現金寶」。

積臣認為呢類理財產品有個好處,股市唔好時,買股票隨時蝕錢,但全現金同樣輸通脹,但呢類固定收益理財產品回報高過活期存款利息,亦可以隨時提現轉返現金,最重要係入場費唔高,唔似其他平台嘅基金或定存,下下要幾萬蚊先入到場。呢啲理財產品係一種彈性選擇。

積臣認為如果多啲券商提供呢類理財產品係一件好事,可以令更多本金唔多、年輕嘅投資者進入投資市場。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版