【銀行短訊】成日收到銀行SMS 知唔知背後銀行做緊咩?

博客 13:13 2019/09/04

分享:

【華田銀行】成日收到銀行SMS 知唔知背後銀行做緊咩?

今次華田銀行會連續兩集講吓銀行點樣用SMS推廣服務,首先會講吓香港某間銀行嘅「SMS宣傳神器」點樣解決現時銀行做direct marketing嘅困局;之後會分享呢個「SMS 宣傳神器」畀華田嘅體驗,希望大家睇完唔好中伏喇。

【延伸閱讀】【卡數停不了】信用卡碌多咗 原來係payWave作怪

現時direct marketing的困局

大家可能閒時都收唔少銀行嘅marketing materials,但就算個offer幾吸引都好,如果無一個seamless嘅申請程序都係嘥鬼氣。舉個例,例如𠵱家有個貸款宣傳,如果要個客:

A) 主動打去你嗰個永遠都無人聽嘅call centre;或者
B) 上番官網搵你條link再入一輪資料;或者
C) login番e-banking再搵番個offer出嚟;或者更過份地
D) 填份紙本嘅app form再寄番畀你的話

我係客嘅就係請你食蕉算喇。

𠵱家一般最seamless嘅做法頂多係推個SMS/eDM(electronic direct mail)嗰陣連埋一個URL連去官網before logon嘅申請表,個URL係general嘅,同自己喺Google search嘅無異。即係話就算你有e-banking,都係填一張白紙,一樣要重新入過晒自己姓乜名乜;如果銀行有甚麼personalized offer畀你,當然亦show唔到畀睇你啦,呢個係before logon嘅版面,人人都一樣架喇。

大家會問做咩唔喺條URL度整啲嘢,等個客一撳入去就自動login e-banking呢?咁當然唔得,因為咁樣會有保安嘅問題,即係整一道backdoor畀人偷入你個e-banking。

咁要求個客入晒username加密碼,再帶佢去個e-banking offer嘅版面又有無得諗呢?我答你,其實都唔work,因為銀行根本唔可以畀條link個客直接logon e-banking,因為咁樣好易有偽冒SMS,誘導個客去一個假site,個客一入username同password就出晒事喇。你點知個SMS唔係hacker假扮嘅呢?

又退後些少諗,就算你有辦法打得甩呢個問題,如果個客無用e-banking呢?有信用卡但係無存款戶口嘅客無e-banking嘅比例相當高嗰喎。

【延伸閱讀】「借錢梗要還」同「還得到先好借」有咩分別?

SMS直駁「個人化貸款申請表」

而呢間銀行嘅神器,就係當佢推SMS畀你嘅時候,每個客戶都會有一個獨特嘅URL(由reference ID控制喇),撳入去會去到一個頁面,裏面會裝住你嘅pre-approval amount,大家可以喺上面改loan size改tenor,然後佢仲會話番畀你知有無爆額、每月又要還幾多咁,揀啱再按申請就OK,唔使再入個人資料。

成個感覺就好似你已經login咗e-banking,但實際上你無login,只係每個客都有個獨特嘅頁面,咁銀行就分到邊個客打邊個客,咁你就唔使再入自己啲個人資料喇。咁個客戶體驗就好正,唔使login、唔使download apps、亦唔使入個人資料,揀啱金額同月份,對一對啱使嘅,一撳就申請咗架喇。

每位客戶都會有一條獨特的URL

按下後會到了申請表,除你的 pre-approval amount以外,還有計數機讓你計清計楚

功能當然唔止咁簡單

大家可能覺得呢個功能好普通,其實呢個function好聰明,由於成個流程都無牽涉客戶資料,就算畀人偷到個SMS或者撞到個網址,都只係知有個人有張卡同有幾錢信用額,個客姓乜名乜係男係女完全唔知,個客無多餘嘢要入,亦唔需要有e-banking,但係銀行一樣可以認到個客,咁就大家都方便啦。

呢個function另外一個super powerful嘅地方就係銀行可以知道個客「有無」同「幾時」入過條link,甚至可以知道個客有無「重覆進入」,咁呢啲資料就好值錢喇。舉個例子,如果個客前後已經入過幾次呢條link但都仲係未申請,好可能反映緊佢心大心細中,咁就好值得叫call centre投資一個outbound call去促成呢單交易喇。

就係呢個outbound call,令華田再次踏上一趟該銀行呈獻嘅特別體驗之旅。當online嘅世界做得幾完美都好,offline嘅世界永遠都可以係另一回事,到底發生咗咩事呢?待續。

 

【文章來源:華田銀行;已獲授權轉載。原題:銀行閑談(60)—Shitibank的SMS宣傳神器】

【關於作者】
兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版