港鐵「一頭煙」 主席去咗邊?

博客 13:20 2019/09/03

分享:

港鐵「一頭煙」 主席去咗邊?

二十多年前,「排骨B」讀幼稚園,當然有教唱歌。某晚,佢大唱特唱《太陽伯伯》。我肥碌一聽,嘩,正!立即翌日帶佢到香港電台錄音室,一take過請佢用清脆的BB聲演唱。從此,《太陽伯伯》成為九十年代《晨光第一綫》主題曲。相信,當年聽眾,必記得一把可愛到暈的聲綫演繹:太陽伯伯、太陽伯伯,你去咗邊?你去咗邊?快啲快啲出嚟,快啲快啲出嚟,照着我,照着你!

今天,小弟為乜記起呢首歌?

正因七月份開始,港鐵新主席歐陽伯權上場(剛剛佢有「陽」、「伯」兩字),除咗公開「掃垃圾」,將公司盤數不理想之處「掃」番俾上手管理層(即係話:唔關我事!)之外,根本只扮演隱形人角色。

過去兩個月,發生在港鐵之內的大事件,幕幕高潮幕幕甘,整間公司成為「政治主角」。

哈,呢位歐陽伯權,恍似「關唔關佢事都唔關佢事」咁款,一次都無出來向公眾解釋港鐵的態度及立場。

呢種處事態度,與上任主席馬時亨一百八十度相反(以往,港鐵有大事發生,「肥馬」必第一時間撲出來認責,正是學術書上的claim ownership)!

究竟,港鐵董事局對近日發生在港鐵的種種「震撼性」事件點諗?持乜原則及態度?與警方的默契及溝通如何?總應向廣大市民以至股東來個交代!

【原文標題:港鐵要交代

撰文 : 曾智華

緊貼財經時事新聞分析,讚好hket Facebook 專版