特首林鄭!諗都唔好諗實施《緊急法》

博客 07:30 2019/08/31

分享:

特首林鄭!諗都唔好諗實施《緊急法》

作為深愛香港而又主張和平、理性、非暴力的一名香港市民,我肥碌今天大大大大聲警告林鄭月娥──諗都唔好諗實施《緊急法》!因為,後果已寫在牆上:

(一)立即攬炒;

(二)全城「站出來」賀國慶!

這是小弟數十年時事分析的判斷與直覺。除非想香港死的「陰毒一族」,才會鼓勵特首將香港真真正正──推落懸崖!

一個並非民選,已經毫無民意支持的特首,作出多次低級政治判斷,搞出大鑊泡。然後,擺明有良好的紓解民間憤怒、怨氣的方法(自己問責辭職,履行競選諾言;明確講出撤回《逃犯條例》修訂;設立獨立調查委員會)不用,改而次次刺激示威者──你錯晒,搞到暴力不斷升級。同時,對警方濫用暴力及被指勾結黑社會則視而不見。

老友,平情而論,大家見到一個咁嘅特首,用咁嘅手法「管治」香港,若果唔㷫,就唔係正常人啦!

好嘞,事情發酵近三個月,仍然用一言堂(對內,個個官員都唔敢進諫)及只偏聽建制派指手劃腳,意圖解決問題,唉……

若林鄭月娥在如此客觀形勢(非普選、無支持、觸怒群眾)下行《緊急法》,強行獨裁地運用權力封報紙、打壓言論自由、未經審判拉人坐監、凍結資產……各位各位,若你仍覺得自己是香港持份者(Stakeholder),會否袖手旁觀而唔揭竿而起大大聲喝止?

呢一鋪,我身邊大量「和理非」聲明忍無可忍了。

十萬火急呀!林鄭一意孤行就嚟真攬炒喇!

【原文標題:諗都唔好諗!

撰文 : 曾智華

緊貼財經時事新聞分析,讚好hket Facebook 專版