【Back to school】大學生要如何理財?

博客 13:11 2019/08/30

分享:

大學生要如何理財?

話咁快就係9月2日開學日,對於大學生來講,今年暑假當然係不平凡,但生活總要繼續過。對於啱啱升讀大學嘅學生嚟講,係會感到非常新鮮,因為你已經成為「大人」了,大學上堂時間唔再係固定,時間自己管理,學習進度自己規劃,加上可以上「莊」,有大量課外活動可以參加,而且可以做part time賺生活費,一切都係獨立自主了。正因為生活多姿多彩,好多時大學生容易忽略理財規劃。

積臣之前講過,年輕一代係理財規劃方面好不足,唔只係消費慳錢,亦包括個人財務規劃、參與投資活動等。積臣今次唔係講咩大學生過度借貸、碌爆卡、消費過度等,而係大學生應趁年輕時及早做理財規劃。

第一步︰知慳識儉儲本金

第一步當然離唔開要識開支規劃,大學生同班friend一齊happy、買心頭好係難免㗎喇,不過唔好過度消費,先改變消費觀念,分清楚「必要」同「想要」,唔係必要盡量唔買,再每月統計一下支出概況,畀自己一個每月儲蓄目標,例如將零用錢或工作收入嘅5%或10%儲起。喺𠵱家手機年代,好多理財APP已經可以好清楚整理你嘅每月開支。

第二步︰開始投資

有本金,先可以開始投資。投資產品眾多,例如股票、債券、基金、保險等,門檻同功能各有不同,加上各種「投資風險高」,「隨時輸身家」等聲音,令好多大學生都驚咗投資。其實積臣都講過,揸現金回報係會跑輸通漲,特別係喺後量化寬鬆年代,人工已經追唔上資產價格升幅。當出到嚟社會做嘢時,就會感受到辛勤工作,但你嘅人工並唔一定成正比嘅感覺,加上出社會工作後開支係會大咗,你會發現戶口啲錢係唔見特別多咗好多。到時先發現自己要識投資,雖未算遲,但始終早好過遲。

【延伸閱讀】手揸現金只會輸通脹 愈後生更要愈早理財

大學生當然先充實一下自己投資知識,唔識嘅嘢千奇唔好亂碰,更要清楚自己可承受嘅投資風險。積臣個人意見係,對大學生來講最好嘅方法係月供股票,因為大學生本金唔多,月供股票最低500蚊就可以入場,而且透過平均成本法可以分散市場風險,當緊急要用錢時,亦可以馬上套現到(月供股票係長遠規劃,供越耐個投資回報先會更佳)。

【月供股票】7間銀行及證券行月供股票的收費比併!邊間只需5蚊?

【月供股票】職場新人資金不多 善用月供股票賺取穩定回報

現階段大學生宜月供指數ETF,港股有盈富基金 (02800) ,美國有標普500指數(代號︰SPY),原因係積臣之前亦講過,指數投資好多時係跑贏主動基金,而且指數ETF好多係有息派,再將派息投資返落去。等出來社會工作,收入變多,再加大月供額或再供多幾隻指數ETF或個股。假以時日,喺複息計算下,回報係好可觀。唔信?撳下錢家有道個計算機

假設你由20歲開始月供500蚊,當每年3%回報,45年後會有570,186.5元;假設你25歲先開始月供,供款額同回報率不變,65歲有463,029.8元,足足差左11萬左右。供款額及回報率愈大,最終回報當然係愈可觀喇!

假設每月供$500,供45年,年回報率係3%,65歲可以攞到$570,186.5。

假設每月供$500,供40年,年回報率係3%,65歲可以攞到$463,029.8。

【延伸閱讀】時間證明 一般投資者更應該投資指數?

第三步︰投資自己

當然,積臣認為最大嘅投資就係投資自己,提升自己技能同裝備自己,學理財可以提升你嘅收益,而投資自己能增加你嘅本金。你有能力及競爭力,先更大機會喺就業市場上遊。當然,積臣明白Z世代唔一定鍾意打死一份工,𠵱家講緊零工經濟(Gig Economy),更唔一定要有固定工作去賺取收入,但起碼你要有技能,先會有用武之地。

最後總結一下,好多人話大學應該係求學問嘅地方,積臣講理財投資好似好「銅臭味」。不過,喺香港呢個地方,生活成本高、人工增幅慢,樓又貴,公共退休保障制度不完善,想生活舒服啲,真係要識理財投資去增值財富。積臣只有嘆息──呢個係社會現實。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版