《電流戰爭》誰係最終贏家?

博客 18:29 2019/08/23

分享:

積臣今年最期待嘅電影就係啱啱上映嘅電流戰爭,呢套戲本來喺2018年上映,但因為原發行商溫斯坦影業嘅創辦人哈維溫斯坦嘅個人醜聞,令電影推遲到今年先上映。電流戰爭》係講述19世紀美國兩派供電商爭奪美國供電市場嘅故事。

19世紀,正是美國由用油燈同天然氣照明,轉變為用電照明階段。一幫係以發明家愛迪生為首,主張直流電(DC)技術,而另一幫係主張交流電(AC)技術嘅商人佐治威斯汀豪斯嘅西屋電氣,兩派目標都係要成為美國最大供電商。

發明家愛迪生。

商人佐治威斯汀豪斯

直流電同交流電,簡單講係兩種唔同電流技術,直流電係輸送過程上損耗高,要避免咁樣情況就要每隔1公里增設發電站組。但交流電可透過變壓器升降壓,輸送過程損耗較少,亦能避免興建大量發電機組,總建設成本亦比直流電平。

兩幫爭奪成為美國最大供電商。

商場爾而我詐

戰爭一開始係威斯汀豪斯得到較多機構同政府支持,但愛迪生心有不甘,一開始先告對方侵犯自己嘅電燈泡專利權,其後使用旁門左道打擊敵方,例如誇大交流電嘅危險性,好易電死人,更加拎隻馬喺記者面前做實驗,電死隻馬(係現今世界當然係好唔人道喇)。愛迪生又喺電椅死刑中從中作梗,宣傳交流電嘅壞處。

威斯汀豪斯知道被對方中傷,點會唔反擊?亦派間諜揭露愛迪生「製造」交流電假新聞嘅消息,兩幫陷於「泥漿摔角」情況。最後,尼古拉特斯拉加入威斯汀豪斯間公司,佢改良咗西屋電氣嘅交流電技術,成功幫威斯汀豪斯贏咗1893年芝加哥世博單標書,成為官方供電商。而19世紀電流之戰終由交流電一幫勝出,世界從此有廉價嘅電力使用。

現實的愛迪生

現實上,大眾對愛迪生認識當然多過威斯汀豪斯同特斯拉,而愛迪生最後能名留青史的,主要因為佢擁有超過1,500項發明專利,當時佢名氣同名聲都非常大。相反,威斯汀豪斯喺19世紀電流之戰無申請專利權,死前更燒毀所有文件,並表示只想令世界更多人有電使用,而特斯拉更加同威斯汀豪斯同舟共濟,放棄當中嘅交流電專利金,更向世人公開交流電技術。

後世有評價認為愛迪生做商人技倆更高超,例如德國科學家亨利戈培爾早過愛迪生發明白熾燈泡,但佢無申請專利權。之後愛迪生申請專利權,並聲稱其他人嘅發明侵犯佢專利權,繼而提出訴訟。發展至今,好多人以為愛迪生發明電燈泡。

特斯拉原本係愛迪生員工,據佢本日記記載,當時愛迪生答應如果能解決直流電發電機問題,會畀佢5萬美元獎金,最後特斯拉真係做到了,愛迪生卻反口話「這只是一個美式笑話。」即係唔認數,特斯拉之後憤而辭職。以𠵱家嘅準則來嚟講,愛迪生都算係刻薄員工嘅老闆。

特斯拉不滿愛迪生欺騙他。

被遺忘的物理學家

不過,積臣對電影描述特斯拉的篇幅太少感到失望。特斯拉係一個世人被遺忘嘅物理學家,佢係近10年先多咗人認識,其實都歸功於美國電動車車廠Tesla,車廠個名真係為咗紀念尼古拉特斯拉而命名。

特斯拉發明嘅交流電發電機,令電力更易商業化及廣泛使用,推動工業發展及家居用電普及。當年加拿大尼亞加拉大瀑布既發電站,特斯拉都有參與,而且用嘅就係佢發明既交流電發電機,為35公里外的美國紐約州水牛城供電,當時係一個創舉。特斯拉當然仲有好多發明,但都因為種種原因,令佢唔可以名留青史。

最終贏家係?

電影其實係好好睇,緊張之餘,又睇到商業市場上嘅爾虞我詐,2小時電影要交代晒19世紀嘅電流之戰,其實好難,所以電影係有啲匆忙感覺。最後,入場前最好溫下書,先較容易理解當時時代背景。睇完電影後,積臣感覺係有名氣、有名聲,你講咩都啱。

電影係威斯汀豪斯同特斯拉贏咗愛迪生,但特斯拉晚年潦倒,最終孤獨死於酒店內;威斯汀豪斯晚年失去咗西屋公司,雖然美國電氣工程學會頒發獎章以表揚佢貢獻,不過獎章名卻係「愛迪生勳章」。

你話,誰係最終贏家呢?

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版