財爺加碼派糖措施 其實作用有限

博客 16:08 2019/08/16

分享:

財爺加碼派糖措施 其實作用有限

噚日我哋嘅財政司司長陳茂波,突然公布一系列支援企業同市民措施,當中主要係派糖,無論係企業同市民都派,積臣都係小市民一個,都關注下派糖有無我份。但其實今次財爺係預算案以外提出咁多派糖措施,其實係罕見。

財政司司長陳茂波。

喺對市民嘅派糖措施,好多都係舊調重彈,例如公屋免租、綜援出雙糧、電費補貼等,今次政府醒咗啲,照顧埋N無人士,擬透過關愛基金向非公屋住戶和未領綜援嘅低收入家庭提供一次過嘅生活津貼。但對於一直話係夾心嘅中產,除咗稅務寬免增至100%同電費補貼外,受惠有限。大學生當然又有聲音,就問點解大學生無得拎2,500蚊學生津貼。財爺加碼派糖措施,仍然滿足唔到所有人。

【財爺派糖】財爺加碼派糖措施懶人包 有冇一款你受惠到?

經濟下行 應政投資谷經濟

不過財爺被問到今次突然加碼派糖,係咪因為最近兩個月嘅示威活動,要安撫人心,財爺當然否認啦,話主要因為香港經濟面對下行壓力,要為經濟注入動力。香港經濟下行都唔係今日嘅事,打咗年幾嘅中美貿易戰已經令環球擔心會引致全球經濟衰退,所以有經濟分析師指本港貿易、投資、消費構成早係今年第一季起已開始下跌,主因係中美貿易戰,最近經濟數據差都只係延續。

一直以來,特區政府嘅財政理念係,面對經濟下行,政府更加要投資,創造更多就業職位。中學經濟堂都教過,GDP構成C+G+I+(X-M),即係當地消費總量(C)+政府支出(G)+ 投資總量(I)+[出口量(X)-入口量(M)]

經濟下行時,C同I都會下跌,咁政府就要加大G去維持GDP增長。政府都知呢個理論,亦都係一直沿用財政政策,例如面對08年金融海嘯時,當時特首曾蔭權就提出10大基建去谷經濟。今次香港面對經濟下行,財爺唔係諗谷經濟措施,竟然係派糖191億,其實積臣真係有好大個疑問,特別係呢個緊張時刻公布呢啲措施,你話目的唔係平息民怨,積臣真係唔信。

持續兩個月的示威活動。

應投放於民生措施

其實市民比較係想政府將盈餘投放喺更多民生措施,香港人面對嘅係醫院病床緊張,老人院宿位不足、劏房的非人生活、上車難等,所以政府要從根本問題着手。今次派糖有無效去平息民怨?積臣覺得無乜用,因為示威活動係將積累已久嘅對政府不信任及施政不滿爆發出嚟。不過話時話,我都想同財爺講,嗰4,000蚊我仲未收到呀!!

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版