香港ETF市場幾落後？ 從4種ETF講起

上兩集講過一般投資者投資指數會係更好選擇。指數ETF收費低，又可以喺交易所買賣，非常適合散戶。講到ETF市場，香港都有幾隻代表，例如係盈富基金 （02800） 、安碩A50 （02823） 等。但相比美國，香港ETF數目只係小巫見大巫。其實ETF選擇多，相對可以幫投資者分散風險，同埋建構均衡投資組合。

【延伸閱讀】時間證明 一般投資者更應該投資指數？

截到港交所6月數據，香港𠵱家有129隻ETF同槓桿及反向產品上市，類型包括追蹤各地指數、地區性市場、商品、定息產品及貨幣等。而喺美國上市有超過2,200隻ETF，類型更豐富、更多元化。

依照ETF所追蹤嘅目標，通常可以劃分成四類，分別係商品型ETF、滙率型ETF、股票型ETF同債券型ETF。

商品型ETF

呢類型嘅ETF追蹤嘅目標係原材料價格，例如能源、貴金屬及農產品等。香港只有黃金及石油ETF，但喺美國方面有更多，例如白銀、工業用途的各類金屬、農產品 、天然氣ETF等 。   

例子︰

iShares Silver Trust （代號：SLV）︰白銀ETF，追蹤倫敦金銀交易協會銀價。

Invesco DB Commodity Index Tracking Fund （代號：DBC）︰農產品ETF，追蹤 DBIQ Diversified Agriculture Index Excess Return。

股票型ETF

有投資開股票都應該對股票型ETF幾熟㗎喇，呢類ETF亦都係港股同美股市場佔最多。根據市場地域，又可以劃分為三類，全球、區域同產業型。

全球型即係橫跨了世界各地嘅ETF，例如Vanguard FTSE Developed Markets ETF（代號：VEA），是投資美國以外的已發展市場，追蹤MSCI EAFE Index，組合最前五大國家分別係日本、英國、加拿大、瑞士同法國。

既然有已發展市場，梗係有新興市場ETF，Vanguard FTSE Emerging Markets ETF（代號：VWO），追蹤FTSE Emerging Index，組合前五大國家分別係中國、台灣、印度、巴西同南非。

第2種係區域型ETF，即係涵蓋國家或地區，盈富基金就係屬於呢種，追蹤香港恒生指數。係港交所上市嘅國家或地區市場ETF其實唔少，有巴西、越南、俄羅斯等，但普遍成交好低，較活躍都係同恒指或A股相關嘅ETF。

美國一樣有區域型ETF，但有更多玩法，仲有分大、中、細價股ETF，例如Vanguard Small Cap ETF（代號：VB），美國上市的小型股，追蹤CRSP US Small Cap Index。

第3種，產業型ETF係香港市場最缺乏，美國就更加多元化，例如消費品、金融、醫療、能源、科技等，而且科技ETF中，更有唔少係改變咗傳統社會嘅行業。

例子︰

First Trust ISE Cloud Computing Index Fund（代號：SKYY）︰雲計算ETF，追蹤ISE Cloud Computing Index。

ETFMG Prime Mobile Payments ETF（代號：IPAY）︰移動支付ETF，追蹤ISE Mobile Payments Index。

滙率型ETF

想投資貨幣，唔一定要要換現鈔，ETF亦都係一個入門級選擇。滙率型ETF追蹤嘅目標就係各國嘅貨幣，香港主要係港元同美元ETF，如果想投資更多貨幣，美國市場就有更多，例如日圓、英鎊。

債券型ETF

香港買賣債券風氣唔盛行，就算你想買，途經唔多，而且入場費高，似係唔歡迎散戶投資咁款，所以債券ETF為散戶提供門路。香港上市債券型ETF主要係中國國債，港債同美國國債只有小量。

美國債券市場十分活躍，ETF方面除咗有美國國債，收取固定收益外，仲有公司債、市政債、高息債等。

例子︰

iShares 20+ Year Treasury Bond ETF（代號：TLT）︰美國20年國債ETF，追蹤 Barclays Capital 20+ Year US Treasury Index。

iShares iBoxx $ Investment Grade Corporate Bond ETF（代號：LQD）︰投資級公司債ETF，追蹤iBoxx US Liquid Investment Grade Index。

積臣今次只提到最正路嘅ETF，美國仲有槓桿型ETF及反向型ETF，呢兩類係美國交易所都好熱門，有啲更加係3倍槓桿，當然投資風險亦都高喇。因為篇幅所限，積臣列唔晒美國所有ETF，有興趣可以click下面個網站去睇睇。但想平衡返投資組合，或令投資組合更多元化種類、其實眼光唔使局限喺香港！

實用美國ETF網站︰按此

 

【作者簡介】90後製作公司打雜，熱愛打機，亦愛行山吸收靈氣，希望快啲儲夠錢享受人生。