手揸現金只會輸通脹 愈後生更要愈早理財

博客 17:25 2019/08/02

分享:

手揸現金只會輸通脹 愈後生更要愈早理財

美國聯儲局終於宣布減息,呢個「傳聞」積臣都由年頭聽到𠵱家。聯儲局主席鮑威爾否認美國開始減息周期,強調今次減息只係「周期中期調整」(midcycle adjustment),但美國總統特朗普又突然係個人Twitter話9月會對中國進口貨品加徵10%關稅,有分析就話其實係特朗普係想迫鮑威爾加快減息步伐。

減息又何止美國呢!歐洲央行早前先預告,至少至到明年上半年,利率會維持現狀,或會下調至更低。澳洲早係上月頭已經減息,今日巴西央行亦都宣布減息。驟眼睇,寬鬆貨幣政策其實一直無離開過我哋身邊,同時有樣嘢都無離開我哋,就係通脹!

通脹時間多過通縮

睇返香港通脹數據,香港近38年嘅平均通脹率係4.32%,除了喺1997年亞洲金融風同沙士兩段時間,其實係好少出現嚴重通縮。4.32%嘅通脹率,即代表呢段時間你嘅整體財富要有4.32%增長,你啲財富先唔使眨值。就算你工資增長追到通脹,但要財富增值就係追另一條數,同時好視乎嘅你財富目標。

1981至到2019年7月通縮率

未來通脹率係幾多?無人可以預測到,但從歷史數據可以見到,通脹時間比通縮時間更多。如果環球再次量化寬鬆,推行零息率政策,只會再令富者財富更豐厚,貧者繼續貧,而所謂高息定期存款去做保本?Sorry,都未必再有喇!

想財富增值更要識理財

對於所謂「理財」,好多人只係流於慳錢同埋儲錢一層,即係控制每月日常支出,將薪金餘下嘅薪金儲低。香港人一直都有儲蓄習慣,呢樣嘢要讚。香港存款保障委員會喺3月有個調查,指7成受訪者有儲蓄習慣,當中儲最多錢係30至49歲年齡群,但高達25%嘅90後係「月光族」。但就算你儲幾多都好,你揸住現金,只會係輸通脹,更遑論到講要財富增值。

【延伸閱讀】退休係嘆世界定捱世界? 你要知道的退休真相

更好「理財」方法係個人財務規劃、參與投資活動等,除了平衡個人收支、仲有買入資產、處理債務、稅務、保險保障等。其實積臣覺得現今教育、社會環境仍未教授青年人積極理財嘅知識,加上上一輩有意無意強調買股票、基金風險高,會輸身家,仲強調「2008年有辦你睇喇!」但理財唔係一時三刻炒賣,而係一個長遠規劃,回報要睇長遠。

今時今日,理財方法多到眼花繚亂,例如債券、基金、強積金自願性供款、年金、月供股票、儲蓄保險、醫療保險等等。上述提到嘅工具各有利弊,但工具已有,行邊條路要自己決定,你想未來多一份收入,生活輕鬆啲,定係要勒緊褲頭,任由通脹食你份糧都唔理,繼續工作換取收入,全部自己決擇。特別係愈年輕去做財務規劃、參與投資活動,喺複息效應下,你嘅資產回報更加可觀!

【延伸閱讀】優質財富管理前先要識的「理財金字塔」

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版