時間證明 一般投資者更應該投資指數?

博客 17:31 2019/07/26

分享:

上期積臣講MPF,其中有講到短期表現MPF嘅基金比指數回報差,但長期係有一小部份MPF基金係跑贏指數嘅,MPF睇落唔係咁差,但前提係你揀啱嗰隻基金,先搭到班順風車。

【上集提要】MPF收費貴回報廢? 唔想輸錢你要識揀優質受託人

好多時投資者都會將投資產品拎嚟同指數比較,指數已成為投資產品嘅基準(benchmark)。指數投資近年備受投資者歡迎,其實係多得有「指數基金之父」之稱嘅約翰柏格(John Bogle),而佢係今年1月去世。

約翰柏格(John Bogle)

平價指數基金打贏主動基金

喺70件代,約翰柏格一直唔滿意當年美國互惠基金公司推出嘅基金收費太高,加上同當時任職嘅公司有分歧,喺1974年佢自己出嚟創業成立Vanguard Group(領航集團),並喺之後一年推出全球第一隻指數基金,並以低收費招徠,呢隻就係𠵱家Vanguard 500 Index Fund

𠵱家睇返好似好普通,但當年隻基金係顛覆咗投資市場,因為指數基金唔會主動揀股,投資組合主要跟隨指數嘅成份股而變化。加上佢推出基金之後,仲不斷減價,憾動同行。其實一定有好多人質疑,邊有「基金佬有錢唔搵」。無錯,我覺得呢個基金佬真係有錢唔搵。佢曾提過,投資世界,貴未必是好,平卻一定是正!因為慳到嘅收費係你能夠代落袋嘅錢。約翰柏格亦指,指數基金更適合一般投資者,根據S&P Global SPIVA截至去年底數據,美國只有17.86%主動基金喺過去5年跑贏標準普爾500指數。

美國只有17.86%主動基金喺過去5年跑贏標準普爾500指數

領航官網上顯示,截至2019年6月30日,標準普爾500指數基金已經累積4,832億美元資產(約37,746億港元),管理費只有0.14%,遠低於其他同類基金平均費用0.95%。如果投資10,000美元,經過10年,指數基金總費用只係329美元(2,570港元),比買同類型基金慳咗1,826美元(14,267港元)。

標準普爾500指數基金收費比較

買ETF比基金更方便

時至今日,與指數基金同為被動投資嘅有ETF,ETF大家實聽多得,而世界上第一隻ETF係1993年喺美國交易所上市嘅標準普爾500指數ETF,簡稱SPDR,上市編號為SPY,之後,追蹤道瓊斯指數、納斯達克指數、羅素指數等ETF紛紛問世。ETF好處係可以係證券交易所買賣,快捷方便,而且收費簡單同便宜。

打開格價戰嘅領航又點會唔玩埋ETF一份,而佢隻追蹤標準普爾500指數ETF為Vanguard S&P 500 ETF,上市編號為VOO,費用只係0.03%,比SPY嘅0.0945%更平。Vanguard旗下仲有其他ETF,間唔中就會宣布減價。所以𠵱家投資者真係唔怕無嘢買,至怕買得貴。

港交所𠵱家有129隻ETF同槓桿及反向產品上市,最大市值ETF就係大家熟悉嘅盈富基金 (02800) ,收費係0.09%。

【延伸閱讀】買賣ETF 注意4大要點

最後都要戴吓頭盔,以上並不構成任何投資建議,僅提供作參考用途,本人並無持有任何以上股份及基金。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版