MPF收費貴回報廢? 唔想輸錢你要識揀優質受託人

博客 16:59 2019/07/19

分享:

MPF收費貴回報廢? 唔想輸錢你要識揀優質受託人

有股壇長毛之稱嘅David Webb,早前喺自己網站webb-site炮轟MPF「食水深」,3分之1回報去咗基金經理袋,更呼籲取消MPF。身為職場小薯的積臣,其實都幾同意David Webb講法。

【延伸閱讀】David Webb轟1/3回報落基金經理袋 呼籲廢除MPF

強積金制度自2000年以來運行咗差唔多19年,據積金局《強積金計劃統計摘要》截至2019年3月31日,強積金年率化回報為4%。強積金一直都被市民叫「強迫金」,只因收得貴,但回報唔見做得好。

普羅大眾唔清楚強積金運作,係積臣角度,強積金即係將你每月部份人工拎去買基金,直到你65歲先攞得,作退休用途,不過強積金比街邊零售基金多咗啲政策規管,包括可選擇的基金、受託人行為操守要求、收費項目限制等。

要識揀受託人

積臣睇嘢好簡單,邊間MPF受託人表現做得好,就係good,就算你收得貴都好。MPF聲譽係差,而且短期回報表現經常唔好睇,但長期回報唔算得「垃圾級」。數據唔呃人,根據晨星(亞洲)截至6月30日數據,港股基金做得最好係永明彩虹強積金計劃永明強積金香港股票基金B,10年年度化回報係10.54%;相反盈富基金(02800)僅有4.42%回報(未計股息)。但如果你選了中國或大中華市場,10年最好表現果隻係宏利環球精選(強積金)計劃宏利MPF中華威力基金,有6.06%,比港股基金最勁果隻少4.48%。至於其他類型基金,積金局自己有個比較平台,係可以一眼比較晒強積金基金。

【港股基金比較】MPF港股基金半年表現比較 一隻盈富基金完勝港股MPF?

【中國及大中華基金比較】【MPF】邊隻中國及大中華股票基金表現最好?

就咁睇,強積金都有回報跑贏大市嘅時候,問題係你有無主動去篩選優質受託人。不過唔少人投訴MPF係焗人投資,積臣係同意,但𠵱家MPF遊戲規則已確立,我哋小市民已經唔可以唔玩。積臣過往都強調自己MPF唔可以唔理,始終戶口啲錢係你嘅,如果揀錯市場、基金種類、受託人,你退休時最終回報可以係差天共地。而且𠵱家有「半自由行」,已經可以自己選擇啱心水嘅受託人,而且免費轉換。

【延伸閱讀】MPF表現要好 首先你識唔識睇呢個關鍵內容?

ETF、收息公用股更好

正如David Webb所講,如果MPF「食水」唔係咁深,MPF表現可以再多3分之1,就算政府有一日話要取消MPF,我都會支持,係因為現今坊間有更好的優質投資可選擇,例如收費更低嘅追蹤指數嘅ETF,又或者買穩陣收息的公用股,主要因為呢兩種投資除了股價穩定上升外,而且每年會派發股息,你可以將股息再投入買入股票,將複利效應發揮最大,回報更可觀。而且當你65歲時,除咗累積一筆退休金外,仲可以靠股息幫你賺到被動收入,唔使怕自己太長命而筆退休金唔夠使,呢啲先係真正退休,達到財務自由。

最後都要戴吓頭盔,以上並不構成任何投資建議,僅提供作參考用途,本人並無持有任何盈富基金股份。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版