謊言要付多少經濟代價? 《切爾諾貝爾》核災難的教訓     

博客 16:02 2019/07/05

分享:

上個月,HBO有一套「神劇」上演,呢套切爾諾貝爾:傷心的兒童喺影視評價網站IMBD攞到9.6分,幾乎滿分的評價。劇集重新建構1986年喺前蘇聯烏克蘭普里皮亞季市切爾諾貝爾發生嘅足以摧毀地球嘅核災難,呢宗核災難令政府背上沉重嘅經濟代價。仍然都要事先聲明,以下有嚴重劇透㗎!

電視劇唔長,只有5集,但積臣覺得好完整地還原1986年切爾諾貝爾核電廠嘅核災難,由核災難發生緣由、當地人員如何搶救、市民撤離、政府善後工作及法庭審判,電視劇都有一一交代。整套片無冷場,但氣氛沉重,當中更有唔少血腥場面,例如核輻射令到人體病變場面,睇嗰時要有心理準備。年輕一代睇嗰時最好要知道返時代背景,例如前蘇聯、冷戰等歷史。

【延伸閱讀】《上流寄生族》電影裏的隱喻 窮人無法打破窮宿命嗎?

體制下的謊言令情況萬劫不復

電視劇有一個好明顯訊息,核災難固然可怕,但最恐怖嘅係體制下的謊言,令整場災難陷於萬劫不復。

第一,核電廠屋頂發生爆炸,核輻射向外擴散,但當地官員隱瞞該嚴重消息,就連最高層的前蘇聯共產黨中央委員會總書記戈巴卓夫都被隱瞞。消防員救火時,喺無足夠防護裝備下近距離直接受核輻射傷害;核電廠附近約3.5萬居民受核輻射影響達36小時之久,始獲政府協助撤離。撤離時,政府亦向災民謊稱只是暫時離開,以後仲會返到去,結果係佢哋永遠無機會返到災區。

第二,前蘇聯政府向西德借月球車清理核電廠屋頂高輻射頹垣敗瓦時,竟向西德隱瞞核輻射數據,所以月球車行咗兩步即死機,最後前蘇聯要出動軍人執行自殺式任務。

軍人要穿上全副防護裝備去清理高輻射殘坦敗瓦,當時被認為係自殺式任務。

第三,核電廠係有設計問題,當時有科學家已經知道問題,但消息被高層「和諧」,前綫人員喺唔知道情況下,撳緊急停止掣竟然變咗係自爆制,最終令核電廠發生爆炸,釀成災難。

前綫人員撳緊急停止掣,點知令到核電廠爆炸。

核災難的經濟代價

講完戲,就講下核災難究竟對當時前蘇聯造成幾大經濟代價呢?前蘇聯一共動用60萬人去救災,包括軍人、科學家、消防員、礦工、醫護人員、核電廠工人等,當中為咗吸引軍人、礦工、核電廠工人去做自殺式任務,更要出動重賞。而前蘇聯對呢60萬人亦要提供每月福利、免費住房,免費醫療和療養等。

核輻射擴散令烏克蘭、白俄羅斯及俄羅斯境內均受到嚴重嘅核污染,最終超過336,000名嘅居民被逼撤離,而以切爾諾貝爾核電廠為中心半徑30公里內嘅大片烏克蘭和白俄羅斯領土至今仍被兩國政府列為管制區,經濟活動喺呢個管制地區係禁止。而政府亦要動用龐大資金去善後工作,例如要殺晒管制區所有動物,破壞泥土表層、消毒等。而管制區至今仍然生效。

1986年切爾諾貝爾核電廠爆炸後的情況。

前蘇聯喺1991年解體,加上當時資訊不透明、政府隱瞞等問題,數據唔完整下難以評估整體損失。核事故影響範圍有60%係位於白俄羅斯,據2006年國際原子能總署一份報告顯示,1991年處理核事故嘅政府支出佔咗白俄羅斯國家預算22.3%,呢個數字隨後下跌,到2002年仍佔6.1%。白俄羅斯估計30年以來的損失為2,350億美元(約1.8萬億港元),而1990年白俄羅斯GDP為216.5億美元,唔計算通脹下,一次核災難的損失等於白俄羅斯10年GDP。

近年烏克蘭有限度重開切爾諾貝爾「輻射觀光」,吸引世界唔少遊客到當地「打卡」,雖然可以「活化」用地,增加政府收入,但同時批評政府係喺傷口上灑鹽。

烏克蘭普里皮亞季市已成為鬼城。

人命傷亡,包括自殺任務的「死士」、災民慢性核輻射疾病、國家與人民互信、災民喪失家園之痛,呢啲並唔可以被數字量化。雖然直接令到核電廠爆炸係前綫人員操作過失所致,但更重要嘅係謊言代價可以難以想像。

耗資9.35億歐元新石棺喺2016年安裝完成,預料100年壽命。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版