【顛覆性科技】「人造肉」將會改變全球飲食鏈？
▲ 「人造肉」將會改變全球飲食鏈？
最近有一隻打着人造肉旗號嘅公司喺美國上市，就係Beyond Meat（BYND.US）喇！首日5月2日上市就升咗163%，係今年暫時升得最勁嘅新股。計埋噚日6月20日收市價165美元，總共升咗約5.6倍。Beyond Meat只係一隻食品股，點解可以升得咁顛？
顧名思義，人造肉即係用植物元素去製成可食用嘅仿制肉。Beyond Meat就係一間研發植物製肉類，並會陸續推出漢堡扒、香腸、絞肉等產品，Beyond Meat同時強調人造肉產品有更高嘅營養含量。要生產到可以食用嘅仿制肉，其實背後涉及唔少研發工夫，所以市場視人造肉係顛覆性科技，未來係會改變全球飲食鏈。現時，Beyond Meat已經喺美國、加拿大、歐洲等50個國際市場銷售緊。
健康及環保意識抬頭
人造肉得到追棒，最主要係近年民眾對健康生活嘅追求，已經有唔少報告指過度食肉，容易引起糖尿病、心血管疾病等身體問題。由植物製成嘅人造肉，Beyond Meat聲稱蛋白質係更加豐富嘅。另外，素食者亦被視作人造肉嘅龐大市場。
第二，係民眾環保意識提高。飼養動物肉經常被環保團體指責消耗龐大能源，更會產生大量溫室氣體，Beyond Meat就聲稱自家產品可以節省約46%的能源消耗，而且唔需要大量的水資源同土地飼養牛隻，間接減少溫室氣體排放。
Beyond Meat聲稱人造肉並非要取代肉類，而係提供一種替代選項。積臣我有幸嘗試過Beyond Meat人造肉漢堡包，賣相同動物肉扒無分別，食完之後感受就係無肉味，無肉汁。或者每個人口味唔同，積臣我自己就唔係好接受到唔知食緊咩落肚果種感覺，而且呢個餐要168蚊，貴過動物肉漢堡包。
決定性因素還是價格
其實積臣覺得就算素食者同健康主義者個市場幾大都好，人造肉定價唔降低，始終好難喺大眾層面普及到，因為大多數人都係經濟動物，以金錢做做準則先，你賣太貴，普通人食唔起就係食唔起，你睇下英國知名廚師Jamie Oliver旗下餐廳集團，sell健康主題，但當食物質素唔得、食物價格太貴，最後一樣難逃破產命運。Beyond Meat招牌漢堡肉要價5.99美元（約46.77港元），Beyond Meat稱隨住每年大量研究支出，持續更新製程與配方，可逐漸壓低成本。咁積臣到時睇下點先喇！
最後，Beyond Meat仲係虧蝕中，𠵱家股價只係炒作，我唔排除人造肉係未來會逐漸流行，搶佔到動物肉市場份額，但𠵱家買入就自己要平衡風險喇！
【作者簡介】90後製作公司打雜，熱愛打機，亦愛行山吸收靈氣，希望快啲儲夠錢享受人生。
撰文 : 積臣
欄名 : 積財有計
