後QE時代「灰機」青年 白手興家已經唔係易事

博客 09:00 2019/06/12

分享:

後QE時代「灰機」青年 白手興家已經唔係易事

「灰機」—由屈機引伸過來, 原意指不能在遊戲中擊敗AI心生傷感之情, 用來被用作形容一切令人心灰的事。

早幾日同一位中學教師尹sir食飯,講到代溝問題。佢向我訴苦話佢嘅大公子Alex今年出嚟做嘢,成個人變得好負面,好大怨氣,言談間佢發現仔仔諗嘢好灰,好偏激,而且係月光族,問我有咩辦法。

尹sir育有兩子,細仔下年dse ,以他的成績,絕對有能力升讀大學。尹sir兩公婆都係教師,從來無為自己子女嘅學業擔心過,二人讀書都係自動波,喺屋企亦無咩好反叛嘅舉動。尹sir唔明白點解大仔出嚟工作大半年,會有咁嘅改變。

由溫室走到價值戰場

我先提到一啲已成事實嘅問題,因為大仔嘅傷害已成,但他還有細仔,細仔的傷害則可以避免。重點在於成長環境太富裕,因為二人月入共13萬元,家住北角千呎私樓,一對小朋友,由小都是金雕玉砌,對社會的真像未有足夠了解,以為自己平時生存緊嘅世界嚟睇,世界係美好的。因為無成本,好多人去到廿歲,都唔知道,自己𠵱家嘅生活,到底係用緊屋企咁多錢去維持。咁問題就嚟,你讀緊書,你仲係屋企供給緊你。但到你出嚟做嘢,先唔好講工作有幾辛苦,就講你用你份糧,交返「市值家用」畀屋企,已經係不可能嘅任務。

所以第一個絕望嘅理由就係,家庭收入同自己收入嘅落差。以Alex為例,佢未出嚟做嘢之前,佢享受緊嘅係家庭月入13萬元嘅生活水準。而呢個水準成為左一個標準,到佢出嚟做嘢月入14k嗰陣,佢仲係用緊13萬呢個生活水準去生活,問題當然大,佢會發現原來自己辛苦工作一個月,得嗰萬幾蚊,夠我食定夠我去旅行呢?呢個問題嚴重伸延到結婚問題,有冇聽過一句說話叫做「如果嫁左仲衰過做女嗰陣,咁嫁嚟做乜?」

事實上,兩口子廿幾三十歲,面對一個13萬月入嘅生活水準,又真係好難一開始就好過做女嗰陣。

【畀幾多家用】家用真係隨心? 由大家話事

錯過了資產升值的尾班車

窮生不喜歡用80、90後劃分年代,因為咁同牛頭角順嫂睇3萬點係關口一樣,完全無根據同價值。我會用1985年前後,或者同QE前同QE後出嚟做嘢嚟分,咁分有意思得多。以我為例,窮生2010年畢業,屬於後QE社會人。錯過了經濟起飛的年代,也錯過了資產升值的年代。我雖然也算較早開始投資資產。但同2000前代的投資人相差甚遠。我曾經同一位上市公司主席傾計,佢都話,早知唔使搞咁多嘢,佢啲朋友炒舖炒寫字樓,個個都發達,反而佢用嚟做生意,仲賺得慢左。可見呢十年資產升值係幾誇張。

而家,衰衰地屋企住緊層3房,都代表你屋企有千萬資產。你要係QE後白手賺到一千萬?唔係唔得,難啲,需要更多實力同運氣。所以我有時都叫大家睇清楚啲唔同人寫嘅文章,有啲係分享緊自己係QE前嘅經驗,呢啲經驗係咪真係適用喺後QE年代呢?包括賺錢嘅方式同生活方式,今日同十幾年前係兩個世界,並且係絕對無可能返翻去果陣嘅光景的。

我同尹sir講,你雖然係教師,但係唔係所有嘢都係權威。你就忘記左一路調節子女對未來嘅期望同埋對「價值」嘅理解。好似我就反而無事,我由幼家貧。我畢業之後嘅生活水準頭1、2年只係下降少少,之後年年都上升,所以我完全無絕望,主因係我期望本身已經不高。已經又由於我比較早已經接觸「價值」課題,我明白乜嘢職位,產生幾多價值,乜嘢價值,應付到乜嘢生活水平。唔好畀子女係未出嚟做嘢之前太樂觀,就唔會令佢出嚟做嘢之後咁絕望了。萬幾蚊,就俾佢過返萬幾蚊嘅生活方式佢,唔會等佢太多幻想,所有人由學校走入職場,都係重新開始,你係叻仔叻女,幾年後又係一條好漢。照顧得太好,通常都無咩好結果的。

【文章來源:窮家有道;獲作者授權轉載。原題︰親子理財課之: 別再製造「灰機」青年】

【關於作者】

窮一生,80後多媒體設計師、《窮家有道》網站主理人及《戒窮》作家。22歲由3萬元總資產、12K月薪起步,26歲儲到人生第一個100萬,30歲再翻數倍,座右銘是「學會掌握理財技能,使我可以『窮一生』的追逐興趣」。

撰文 : 窮一生

欄名 : 窮家有道

緊貼財經時事新聞分析,讚好hket Facebook 專版