今日香港 無邏輯可言

博客 12:15 2019/06/11

分享:

今日香港 無邏輯可言

「超過一百萬奉公守法的市民,針對《逃犯條例》,冒住炎夏高溫,上街遊行反對立法,中間的邏輯,我唔係好明。」好事之徒其實最明白當中的邏輯:「當一個人上街表達他的訴求,同一百萬人上街表達他們的訴求,同樣都得唔到回應,中間的邏輯,我更加唔明。當香港每七個市民就有一個唔係好明白呢條法例,而你覺得已經解釋得好清楚,自我感覺良好,市民唔明係『誤解』,中間嘅邏輯,輪到我唔明。」

「當你的世界只係香港呢一塊彈丸之地,別人的世界就係千倍於東方之珠,所有的不合邏輯,都會變得合理。」智者說:「你的『小愛』,又點及得人家的『大愛』重要?」「你嘅所謂『愛』,係指甚麼先?」好事之徒挑戰智者:「『愛』從來不分大小,你的邏輯思維好矛盾,我以為可以在你身上得到一點啟示,結果,我依家的思緒仲混亂,一塌糊塗。」

「所謂邏輯,其實就係common sense,但係今時今日的香港,已完全無邏輯可言,高官、尊貴的立法會議員,寧願將common sense鎖在屋企的夾萬,而你們兩個後知後覺,依家才來討論香港同邏輯的關係,基本上就係廢話。」損友甲決定加入戰團。幾位高人唇槍舌劍,令我這個膚淺之輩,完全跟不上他們討論邏輯的節奏,愈聽愈滴汗、愈聽愈自卑。

「結論:邏輯已死。」好事之徒念念有詞地總結,難得幾位高人一致同意。

撰文 : 鄭丹瑞

緊貼財經時事新聞分析,讚好hket Facebook 專版