買年金≠買股票 不問高回報 只求保到死

博客 11:52 2019/06/05

分享:

買年金≠買股票 不問高回報 只求保到死

同阿強好耐無見,畢業之後去咗Working holiday,返嚟做左好耐文青,又炒咗幾年散,今年30歲,佢毅然放棄咗低薪,學人賣保險。

大家都可能知道,我係唔怕odd,我認為佢唔會sell我,就算會,我都唔會因為佢而買d我唔需要嘅嘢,如果我有需要,我根本唔需要你嚟sell。今次我主動提出傾嘅話題,係「年金」。呢個話題我上年係政府推出香港年金計劃果陣已經傾過,不過早前因為政府公布「合資格延期年金保費」及「可扣稅強積金自願性供款」可以扣稅,又令呢個話題又炒返熱。兩壇野都係保險公司重大收入,保險界好難唔high!所以我主動撩下佢傾,當然,佢係好high。

關於MPF,我已經多次喺專頁提及,相信讀者都知道窮生對mpf嘅積怨有多深,所以我就唔多講了,反而我想講多少少年金計劃,因為阿強向我訴苦,話大家對年金反應冷淡,以香港人今日唔知聽日事嘅性格,年金可謂一碗白粥,的確唔夠虛擬貨幣咁「波濤洶湧」。聽下聽下,我係同意香港人對年金係有錯誤理解的,但係阿強自己好似都唔係好明白,年金嘅真正用途,自己都唔發現,自然sell唔到。於是我呢個layman就以客人嘅眼光解一次畀佢聽年金到底係咩一回事。

年金是保險產品 非投資產品

普遍大眾可能會覺得,年金回報並不算吸引,又要65歲開始先開始有回報,最重要係,年金唔似其他產品,一供就要供足幾十年,一斷供就無,所以我早前喺Facebook page問大家對年金有冇興趣,都係得好少人有反應。

事實上年金唔係投資產品,回報當然唔會有股票/債券回報咁高。正如你唔會攞份人壽保險同張「三穿七」比較邊樣嘢抵買。年金喺技術上當然就係一種保險產品,係長壽保,同人壽保相反,買人壽,係怕死。買長壽保,就怕自己有排都未死,「人又老,錢又無」。所以阿強sell人買年金,唔應該只係強調回報,而係強調長命嘅「危險性」

年金不應只看回報率

正如我上文講到,回報率並唔係最緊要,但市面上亦唔係間間公司都推出長入息年期的年金計劃,即係會包派到你死嘅年金並不多。大多係分10年、15年同20年,如此一來我65歲開始收錢,如果得10年,就算你派凸俾我,我都係收到75歲。香港貴為世界最長壽嘅地方,平均壽命84歲,我攞到75歲之後點算呢?你呢10年派多少少,都唔能夠令我漠視長壽風險啊!10年嘅話,我可以買長年期債券。所以,大家切勿混淆買年金嘅目的。要買,就請派到我百年歸老

【文章來源:窮家有道;獲作者授權轉載。原題︰同保險朋友食飯,談大眾對年金的錯覺】

【關於作者】

窮一生,80後多媒體設計師、《窮家有道》網站主理人及《戒窮》作家。22歲由3萬元總資產、12K月薪起步,26歲儲到人生第一個100萬,30歲再翻數倍,座右銘是「學會掌握理財技能,使我可以『窮一生』的追逐興趣」。

撰文 : 窮一生

欄名 : 窮家有道

緊貼財經時事新聞分析,讚好hket Facebook 專版