家用應該要畀幾多? 父母依賴子女家用不現實

博客 19:38 2019/05/31

分享:

家用應該要畀幾多? 父母依賴子女家用不現實

最近,永明金融發表退休父母對子女每月家用嘅滿意度調查報告,發現子女每月畀嘅家用中位數係6,000蚊,但好多父母對於呢個金額就唔係咁滿意,因為佢哋退休後開支要成16,900蚊,理想與現實嘅落差顯而易見。

【延伸閱讀】給父母家用中位數6000元 你又俾多少?

積臣對於調查結果唔感到意外,因為喺熱門討論區間中都有「巴絲打」問應該要畀幾多家用,特別係fresh grad,唔少更加出現過拗撬。而上面調查更加係講緊退休父母,即係佢哋有機會要以仔女嘅家用支撐每月日常生活。

積臣明白,父母希望子女出社會工作後,可以幫輕下父母負擔,盡下家庭責任,但子女就覺得自己搵唔多,畀得太多家用,自己無錢儲之餘,仲可能要放棄平時消費。

家用要畀幾多?

其實究竟畀幾多家用呢?其實係無固定答案,一切都要家庭成員有共識,雙方坦誠分享顧慮,例如家庭每月開支(例如水電費、大廈管理費)、父母收入情況、房貸、債務等,如果兄弟姊妹已經做緊嘢,又或者仲係讀緊書,需要財政支援,呢啲都係一個考量點。搞清家庭財政狀況,大家再商討分配一個可承擔嘅比率,純粹依賴任何一方只會引爆個炸彈。

要學職投資

但積臣非常唔建議子女將大半份人工奉上,除非你人工真係好高,而你又係家中唯一經濟支柱。喺香港𠵱家物價指數,食飯、搭車樣樣都貴,一個收入唔太高的人,以上使費真係可以佔咗你人工三份之一,再畀埋家用只會所餘無幾。

倒轉諗,無限制地上繳人工,自己最後都會無錢剩,只係一個「窮忙族」,上繳人工後,之後自己亦要節衣縮食,其實自己生活質素都降低咗,長年累月,自己都唔開心喇!

積臣曾經講過,未來香港人口老化加劇,僅靠強積金係唔會夠退休用,因為供款率實在太低,除非你唔介意降低退休後嘅生活質素。所以,你畀家用金額應該以足夠水平作考量,而人工剩餘部份應該儲起,再進行投資。

【延伸閱讀】退休係嘆世界定捱世界? 你要知道的退休真相

喺呢個年代,已唔可以幻想僅靠儲蓄就可以令你財富增值,資產管理公司美盛曾經發表過全球調查,喺過去10年量化寬鬆年代,全數資金投放於3個月現金類項目的投資回報只有約1.0%。根據統計處數據,2009年至2018年的綜合消費物價指數,平均係3.03%,所以全數現金嘅回報係嚴重跑輸通脹。未來假如美國真係減息,或再次量化寬鬆,𠵱家所謂高息定期存款都唔會存在喇!

窮爸爸定富爸爸?

愈年輕就愈應該開始學識投資,運用複式效應,將你辛苦賺返嘅錢滾大。唔好睇少果小小錢,到你退休時回報係可以相差5成以上。唔信可以去「錢家有道」個計算機計下。

【複式效應概念】︰每日少飲一杯咖啡 就可以變成有錢人?

其實再諗深一層,如果父母年輕時有做好退休理財,退休後就應該可以有足夠嘅資金,唔需要僅靠子女家用支撐退休生活。比着係你,你仲想唔想重蹈父母覆轍?所以,家用畀得合適就夠,子女亦需要學識留返啲錢做財富增值。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版