【YouTuber大戰】讀書到底有冇用?

博客 18:50 2019/05/24

分享:

「求學不是求分數」,呢個話題連政府都拍過宣傳片去講解。時代唔同了,最新話題係「讀書無用」論。有留意開年青人嘅論壇,大概知積臣今次想講咩。

事緣係有兩位年輕Youtuber「慕容MoYung」同「Yaki Wong」曾拍片表示喺香港讀完書,出嚟工作都唔一定搵到大錢,更表示學歷已無用。之後有另一位年紀大少少嘅Youtuber「Bob's Your Uncle」就反駁佢哋兩個誤導𠵱家嘅青年人,曲解讀書意思。積臣補充少少,佢哋講緊嘅讀書係指緊學校教育(Schooling Education),即係透過教育機構有目標、有指引性的課程,提供知識及技能培訓,最後得到相關學歷證明。

慕容公子拍片表示學歷高都搵唔到錢。

另一位YouTuber Yaki Wong

Bob 叔就出片反駁另位兩位輪點。

學歷眨值

首先,積臣同意𠵱家嘅學歷已經無以前咁「值錢」,社會對於正規學歷證書嘅需求增加,但此類學歷證明同時係不斷貶值,呢個現象同文憑主義(credentialism)有關。香港80年代由工業城市轉型至商貿城市,都曾經面對過呢個過程,大學學歷嘅人係多咗,但佢哋畢業起薪點追唔上整體薪酬發展,原因都係供多於求。呢啲都係社會轉型時必然面對嘅問題。

缺技術勞工

如果有留意開國際時事,都應該聽過台灣、菲律賓「周街都係大學生」,甚至係博士生,但佢哋人工唔見得係高,甚至唔少菲律賓大學生過嚟香港當家傭,只因為係香港當家傭嘅人工,比佢哋喺家鄉工作收入更好。

相反,𠵱家最缺嘅反而係體力勞動、技術型勞工,有國家甚至開放技術移民,填補國內職位空缺,例如澳洲2017年就好缺金屬板材處理工人(sheet metal trade workers)、櫥櫃製作工人(cabinet makers)、車身打磨技工(panel beaters)等。

讀書無用論

但積臣唔會同意「讀書無用論」,因為讀書唔只係提供知識及技能,其目標係個人提升,提高你分析、批判能力、溝通技巧,令你個人更全面。學歷只係入場券,令你可以進入某些行業,但你無呢張「沙紙」,你入想某個行業都無行喇!更重要係,你喺學校建立到的人際網絡,未來可能帶嚟更多機會畀你。

其實積臣好想講所謂讀書唔只等同讀大學、讀博士過程,就算一個技工學徒,都係透過有目標、有指引性嘅課程去學習,或者你喺工餘讀一個與工作或行業前景有關嘅技能課程,積臣都認為你係讀緊書。讀書係一個不斷學習嘅過程,只有不斷學習,先會豐富到你嘅知識,提升自己。好似微軟創辦人比爾蓋茨(Bill Gates)咁成功嘅人,佢依然繼續睇書,學習新知識。

的確,繼唔繼續升學係個人選擇,你唔鐘意學校教育,走去學維修飛機,做飛機維修學徒,其實都係個人意願,可能令你更搵到錢,但唔努力,自暴自棄就唔要得。

正職外的收入

喺現今科技型社會,搵錢已唔止得正職一種途經。美國一間汽車產權貸款(car title loan)公司TitleMax就分享過現今正職以外嘅收入,唔少係由共享經濟而起的方法,但你無果種技能你又做唔做到呢?與其係度糾結學歷值唔值錢,不如諗如何增值自己,增加知識,擴闊自己眼界,可能搵到更多收入呢!

正職以外的收入。

原圖︰按此

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版