極簡主義其實好啱香港人 原因一字記之曰:細!

博客 09:15 2019/05/23

分享:

極簡主義其實好啱香港人 原因一字記之曰:細!

極簡主義在日本十分流行,無論係一家人定一條友,間屋都係好似乜都冇咁,只要最基本要用既野,仲一定唔會預多。窮生對極簡主義亦感興趣,發現自己與當中一些價值觀不謀而合,亦覺得好適合香港人去了解和反思。

現實少少講,極簡主義好適合窮L。原因一字記之曰:細!一家三口迫在一個200至300呎的空間在香港並不罕見,明明已經好迫,我唔明點解有啲人仲要搞到一屋都係野?我同好多身邊的人都傾過呢個問題,主要原因可分兩類。

第一,東西有用怕浪費。其實好多野你唔會成日用,只是在需要一用的時候買了,又要花空間去放,久而久之,一屋都係好耐唔會用的東西。

第二,用作收藏和回憶。人在演化心理學上已經有儲野既習慣,好大程度上係因為以前生活冇安全感,要手邊有足夠既野先有果種安心既感覺。簡單D黎講就係心癮,有錢有時間有空間,其實冇所謂,最大問題係當你冇時間仲要咁儲法,會唔會分清楚個先後次序,令你活得更自在呢?

極簡主義減少浪費

窮生其實算係一個極簡主義既入門級人士,因為我生活一向簡樸,物慾亦都唔多。生於極端資本主義的香港,對消費反而係一啲興趣都冇,行街好難見到有樣野我係好想買。老土少少講就係,窮生覺得要分清楚咩係Need同Want。

只要你分得清楚,你就會發現日常生活中,有超過一半的消費是不必要。而不必要的消費令你要加倍工作,到頭來為了一樣你冇咁需要既野,迫自己去做一件你非常唔想做既野(返工)。

Less is more精神

極簡主義下,由於要消費既野極少,你成盤數就變得非常易明清楚,思路亦會比之前清晰,因為係你身邊既野很少,反而令你更清楚自己既目標。唔講咁深,就你屋企而言,你會好清楚你屋企的作用,有甚麼應該要有而你未有,有甚麼是你不需要,由物件慢慢推展到身邊既事物。

我發展出既精神就係,透過極簡的外功(減少不必要消費)而得出內功,就係因為唔需要洗好多錢,亦能夠減少不必要工作。由自己最不想要做的東西開始慢慢減少,你就可以慢慢有餘暇發展相對比較喜歡的工作收入,在這個轉化過程中,極簡主義能夠較易令你達到目標。

平時你要2萬元去run既生活,宜家如果1萬元都可以run到,等於你可以減少一點辛苦收入,去發展自己喜歡的收入來源,終極目標是100%喜歡的收入來源。你一日不放棄過度消費,你一日都係行一條有錢就得既工作之路,如果你可以3至5年搵夠還好,更多的就是月光的永恆輪迴。

極簡/消費也要了解自己

所謂唔同人活唔同既人生,有人可以有個遠大理想,有人只是平凡過生活。遠大理想都有分要錢定唔洗錢,如果你既理夢要用好多錢先得既,你必須搵好多錢返黎run你既人生。透過把自己的生活變簡,方便找出自己想要的人生,係窮生暫時覺得最可行的方法,尤其在香港生活困難。

大家為咗過夢想人生,好應該先儲起彈藥,實現日後真正既夢想。對於充滿末世感覺的香港,窮生只能講一句,共勉之。

【文章來源:窮家有道;獲作者授權轉載。原題:極簡主義-窮L快樂的道路】

【關於作者】

窮一生,80後多媒體設計師、《窮家有道》網站主理人及《戒窮》作家。22歲由3萬元總資產、12K月薪起步,26歲儲到人生第一個100萬,30歲再翻數倍,座右銘是「學會掌握理財技能,使我可以『窮一生』的追逐興趣」。

撰文 : 窮一生

欄名 : 窮家有道

緊貼財經時事新聞分析,讚好hket Facebook 專版