南韓5G速度不如預期 香港5G地鐵「load空氣」情況仍存嗎?

博客 16:44 2019/05/17

分享:

煲咗幾年熱話嘅5G網絡,相關支援5G手機係今年初都陸續公開,市場普遍睇好中國5G技術會領先全球,所以國產手機品牌全力搶攻5G手機市場,好似華為、中興、VIVO等。頭啖湯邊個唔想試先?南韓就截糊嘞,率先在4月初推出全國5G服務。

之前報道都指5G網絡速度比4G快20倍或以上,4G下載一條4K片要3至5分鐘,而5G則少於10秒就完成到,更可以促進IoT(物聯網)發展。不過南韓身先士卒,話畀大家知,以上只係理論值速度。據報道,南韓5G速度實際只比4G快5倍左右,部份地點更加係收唔到5G,會自動降頻去4G。當然喇!速度本身好受城市建築、發射站數目、距離等影響。南韓電訊商都要「戴返頭盔」,整返句告示「實際速度與理論可能有差異」,避開誇大宣嘅嫌疑

南韓成為全球首個全國開通5G的國家。

香港方面,有消息就指年底會拍賣5G頻譜,只要有頻譜,電訊商就會積極起發射站,預計2020年第2季正式使用。香港進度落後就梗㗎喇!就算明年第2季有得用,我諗到時都會同南韓個情況一樣,速度比理論值低、部份位置收唔到5G等。

手機上網方面,香港最大問題係咩?其實你我都知道,就係地鐵繁忙時間某啲台雖然有訊號,但係「load空氣」,或者係某啲死位永遠唔會有訊號,每日都有網民分享千祈唔好轉台去某某等。其實核心問題都係繁忙時間要處理嘅訊號超負荷。

其實香港4G覆蓋率並唔低,據OpenSignal係2017年做嘅調查報告,香港4G覆蓋率以90.34%排第4位,只係落後南韓、日本同挪威。不過覆蓋率高,唔代表速度快。該份報告亦指,香港4G上網速度只有17.73Mbps,排名第56位,更落後於不少發展中國家,包括越南、南非、巴西等。當5G覆蓋率變高時,其實會唔會又係同4G情況一樣呢?嚟緊5G,電訊商將要解決兩大問題,一係地鐵「load空氣」,二係5G速度。

積臣奉勸,大家唔好諗住做初頭白老鼠,可以等發展成熟啲先。加上𠵱家5G手機咁貴,好似華為Mate 20 X和Mate X售價過萬蚊,咁貴買部機返嚟,但效能又用唔晒,只係變相浪費。華為都話,千元5G手機喺2020年底就會上市,到時先買都未遲喇!

華為5G機索價過萬

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版