好多理財問題 講到尾都係感情問題

博客 17:27 2019/05/15

分享:

【窮家有道】好多理財問題 講到尾都係感情問題

有幾位讀者問我理財或置業問題時,已經跟我提過有「分手」同「離婚」的念頭,原因係另一半並沒有如自己所想咁,會同佢一齊儲錢,一齊為將來打算。但退一步黎講,你在制定理財計劃時,有冇諗過佢喺你生命中係點存在?呢個到底係我的理財計劃,定係「我地」的理財計劃呢?如果係後者,你有冇同佢商量,而唔係「通知」佢要跟你果套做呢?

金錢觀比金錢重要

「女人幹得好不如嫁得好」,生活困難,嫁個專業人士,有車有樓,有誰不想?不過打開報紙,好多高薪專業人士搞下搞下,又會債台高築,一個金融風暴,死嘅大多都係有少少錢的中產人士,所以,如果你唔係打算幾年轉一個老公的話,金錢觀比金錢更重要。

金錢的發明,減低了交易成本,也量化了供求。講到金錢對一段關係入面重唔重要,我可以講,係一段關係入面,除咗愛之外,最重要就係金錢了。但兩個人係埋一齊,經濟條件多少有分高低,錢多錢少其實並不重要,最重要大家在金錢觀念上有共識,有良好的分工和發展。大家在分工以外容許有自己的空間和習慣,因為你未必明白佢喜歡的東西,你自己覺得對方亂花錢,古語有云:「男人愛高達,女人唔明白」就係呢個道理。大家要定下一個具體的理財目標,維持家庭生活和向上流動,其他的事,請尊重個人喜好。

「愛」也要數目分明

我接到最多讀者問題有兩種,一種係事業不如意,想求教投資/增加收入的方法,另一種就係就黎買樓結婚,條數計唔掂,想問吓我意見。其實香港雖然難上車,但係我講過,早兩年點解香港樓冇可能跌?係問題有好強的供款條件,你層樓唔可以變銀主盤,自然一級級升上去。我地計計數,以一間400萬樓計,你上車入場費1球,月供15K,壓測你有35K都過到,如果你係兩個月,一人都唔駛搵2萬,條數話易唔易,話難?其實唔難。點解上唔到,因為大家冇共識要點捱層樓。

我成日提朋友,愛上一個人,可以好完全係情感問題,鍾意一個人,大可不必講理由,但係兩個人的關係,我建議當一間公司去Run。大家在財政上有付出,有保障,都係愛大家的表現。大家數目清楚,就唔怕付出去捱。以月供15k計,就算其中一個冇收入,另一個人都可以頂到。去到經濟下行,兩人就算一齊做看更,都唔會冇錢供樓,問題係,有冇一方係掛住愛的招牌,將一切「take it for granted」。點解啲人覺得咁難上車?一個人單打獨鬥的話,煮餐飯都難啦!

【文章來源:窮家有道;獲作者授權轉載】

【關於作者】

窮一生,80後多媒體設計師、《窮家有道》網站主理人及《戒窮》作家。22歲由3萬元總資產、12K月薪起步,26歲儲到人生第一個100萬,30歲再翻數倍,座右銘是「學會掌握理財技能,使我可以『窮一生』的追逐興趣」。

撰文 : 窮一生

欄名 : 窮家有道

緊貼財經時事新聞分析,讚好hket Facebook 專版