【報稅攻略2019】fresh grad報稅必填嘅4大項目 填完交少好多稅

博客 18:22 2019/05/10

分享:

又到一年一度報稅嘅日子,潮文話「政府無嘢叻!但追人交稅就最叻」正如今次派錢4,000蚊,積臣仲未收到,但我份報稅表係稅局宣布消息之後,第二日就收到,忽然覺得政府效率其高!

身為職場小薯嘅積臣,出身唔係咩名牌大學、高薪、專業學科,而且fresh grad出嚟做第一份工人工唔高,就算你人工點低,只要你有做嘢,僱主都會幫你報稅。當年收到第一份報稅表,感到新鮮之餘,但又有啲手足無措。積臣覺得正式脫離溫室學生日子,第一係收到畢業後第一份人工,第二就係收到報稅表,現實要迫你成長,要開始承擔更多責任。

今年積臣喺稅局公布完消息後第2日就收到綠色大信封,諗返起當年fresh grad,起碼遲咗3、4個月先收到。fresh grad收唔到呢個綠色大信封,只係時辰未到啫,其實稅局都有解釋啲嘅,設立咗新檔案後,5個月內就會發出報稅表。當你收到報稅表,最煩就係要點填,雖然報稅表只係得4頁紙,但對於職場新鮮人嚟講,你會覺得每隻字都識,但拼埋一齊你會有睇唔明嘅感覺。

報稅表。

回想當年fresh grad收到份報稅表之餘,仲會內附一本填稅指南,算係有份清昕指引逐點逐項教你點填。但之後我就無再收到過了,唔知道係咪稅局響應環保唔印,定只係畀首次報稅人士先有。如果今年fresh grad有收到,記得要珍藏喇!當然,填稅指南亦可以去稅局官網download返,不過積臣覺得都係實體本先方便揭。

報稅表指南

報稅其實主要係填3大部份︰個人資料、收入、扣稅。fresh grad嚟講,主要填薪俸稅,呢part只要填返你係報稅年度僱用過你嘅公司嘅全職同兼職收入就得。但以下4項,唔少fresh grad都唔知或唔記得填,但填咗可以幫你交少好多稅。

1.MPF強制性供款

呢一part好多人都唔記得填,但你無填,稅局係唔會主動幫你扣減。如果僱主有畀返份僱主報稅表copy你,你可以直接抄返MPF供款數額就得,但記住總薪俸入息係填未扣MPF個數。

2.慈善捐款

如果曾經係報稅年度捐過錢去慈善機構,或者做緊恒常捐款,捐款數額可以扣稅的,但記住需要有獲豁免繳稅的慈善團體發出的嘅收據先計數,而且每次捐款數額唔少過100蚊。

3.進修開支

唔少人畢咗業都會繼續進修,特別係從事專業工作,要keep住讀書,考取更高級專業資格。讀書進修費都可以扣稅,但要留意係要獲認可教育課程先可以扣減,如果你係讀興趣班,又或者同受僱工作無關嘅課程,就未必得了。

4.供養兄弟姊妹或父母

供養兄弟姊妹或父母。如果你有仲讀緊書嘅18歲以上、25歲以下嘅兄弟姊妹,或者係55歲以上嘅父母,係可以申請供養兄弟姊妹或父母免稅額。要留意,每項免稅額只能夠畀一位報稅人,如果你有出嚟做緊嘢嘅兄弟姊妹,就要傾下要點分配了,照理分配畀入息較高啲嗰位,扣稅可以扣多啲嘅。

最後,報完稅,就等稅局評估你要交幾多稅,不過通常都要等幾個月先有通知。各fresh grad又唔使估估下、個心囉囉攣咁,稅局網站有評稅計算機,輸入簡單資料就知道自己大概交幾多稅。

評稅計算機。

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版