【逃犯條例】惹人猜疑的不良動機

博客 14:00 2019/05/02

分享:

【逃犯條例】惹人猜疑的不良動機

近日,老友林奮強及香樹輝,簡直為香港的「醫生荒」及「醫療系統崩潰」上晒心、上晒頭。事實,佢兩位早已上晒岸,本可印印腳享福者,但仍日日為香港的公眾事務肉緊。

兩位在其他報章及「黃金五十」網頁早已列出N咁多理據支持開放海外醫生來港行醫,清楚指出,本港代表少數人私利的「醫療霸權」,正在操控七百多萬市民的就醫權利及健康安危,非常荒謬無理!同時,對林鄭月娥作為特首,未有趁空前契機收回香港醫療決策權,相當憤怒。

我肥碌每年自己及帶家母到公院覆診、入急症室及住院N次,對現今的醫管局慘況,瞭如指掌。事實,香港醫療敗壞到今時今日地步,醫務委員會、醫管局及手握制定政策與掌管資源的政府,全要打屁股一千下。

香港專業組織N個,從來無一個似醫務委員會般,可以凌駕政府,這是那門子的道理?林鄭咁打得,為乜應急唔急,眼白白睇住市民震天怒吼,仍不下決心取回醫療決策權?

倒轉,完全唔應急,又俾人砌到無法反駁的《逃犯條例》,則要夾硬上馬,所為何事呢?

泛民反對、商界反對、法律界反對,如今,只得一群「舉手機器」因角色扮演,唔用死力支持唔得。呢鋪,就算夾硬過到,也絕不會得到廣大市民衷心支持。反之,必再一次監粗撕裂民意、撕裂社會,值得嗎?

最尷尬,《逃犯條例》藉口本為引渡一名涉嫌謀殺犯回台灣受審。點知,台灣一口拒絕。唉,林鄭,你點解仲要急成咁?想人唔懷疑你有「不良動機」?真係,好--難嘞﹗

撰文 : 曾智華

緊貼財經時事新聞分析,讚好hket Facebook 專版