【畀幾多家用】家用真係隨心? 由大家話事

博客 19:50 2019/04/30

分享:

【世紀難題】畀幾多家用 由大家話事

有人覺得「畀家用」係必要責任,有人覺得「家用」阻礙下一代展翅高飛。我唔敢講自己係當中嘅專家,但係我似乎可以提供一個思路,讓大家有邏輯地思考一下,親子雙方喺制定家用預算時,有乜嘢考慮因素,令大家更易達成共識,減少言語上,甚至肉體上的家暴。

華人獨有文化:畀家用

講起畀家用,都真係華人社會特色,呢個源自於「孝」。放諸今天,難免引起好多紛爭,而我認為呢啲嘢都係冇必要,我哋就理性解決問題,畢竟家用就係講緊小朋友長大成人,得到收入先會畀。我同意當中有多少係責任、有多少係關愛,而我主要講責任嘅部份,因為關愛不能量化,可以係多多益善,但畀得多,係咪就代表好呢?也不一定。我希望大家主動向父母提出家用安排,拿出計劃書,提醒父母,自己已經長大,我亦有自己嘅路,同時會負起責任。

畀家用學會自立

香港樓貴就係人都知,年輕人係咪咁易好似外國咁,18歲自立可以自己搬出去?唔係咁易。所以父母切勿以此威脅,因為當年你層樓都冇而家咁貴,你唔為子女着想,子女亦唔需要睇你面色,大家講求互相尊重體諒。

我係支持畀家用的,因為呢個舉動有利子女去了解到底一個家係點運作、點維持。一個月到底用幾多電?伙食費有幾貴?因為要制定家用預算,所以佢需要知道呢一切,為將來佢成家作好準備,唔好煮個飯又唔知買幾多斤菜,又唔知原來搞個上網要幾多錢。制定家用預算之前,請花時間了解家庭每月的支出,以家庭總開支為基礎訂立預算,而非好似傳統出糧繳稅的方式,呢個方法只會減少子女努力工作的熱情,亦無助親子關係,好似我畀咗錢就可以咩都唔理,將責任外判。

避免計算住屋成本

香港居住成本高,如果你係業主,又已經供滿層樓,即現實上你已經沒有居住成本(不計管理費及差餉)。如此一來,最好唔好再要求子女畀太多家用,只需要畀一個基本伙食費就足夠。前題是,大家可以一齊制定一個理財計劃,每月定額的儲蓄,用作投資、升學及置業之用。

作為畀家用的年輕一代,也可以反過來主動解釋畀父母聽「自己的人生計劃」。未來數年,你會點樣行,用錢喺咩地方,相信父母行有餘力,又見仔女咁有計劃,都會樂於減少你家用開支,成就你的理想。

等你開飯又點算?

我喺《戒窮》入面提過,貧窮分三種,第三種係家貧型,即係成家等你開飯。你一出糧已經要分畀屋企開支,造成「窮忙」。喺呢嗰情況下,你一定要同家人訂立共識,必要時你仲要把持屋企的財政。因為家貧係長期的,由於屋企嘅理財方針出咗問題所引致。過程中,除咗要計好自己盤數,仲要結構性地幫屋企盤數進行改革,畀錢養家唔係問題,但既然錢由我哋提供,我哋亦有權利及義務為家中開支進行把關,做到全家一齊上流,真正戒窮。

【文章來源:窮家有道;獲作者授權轉載。原題:如何制定合適的家用預算?】

相關文章:愈窮愈見鬼 點先可以脫貧

相關文章:你係邊種窮?對症下藥有得醫

【關於作者】

窮一生,80後多媒體設計師、《窮家有道》網站主理人及《戒窮》作家。22歲由3萬元總資產、12K月薪起步,26歲儲到人生第一個100萬,30歲再翻數倍,座右銘是「學會掌握理財技能,使我可以『窮一生』的追逐興趣」。

撰文 : 窮一生

欄名 : 窮家有道

緊貼財經時事新聞分析,讚好hket Facebook 專版