金正恩唔怕美國 多得俄羅斯、中國照住

博客 16:25 2019/04/25

分享:

金正恩唔怕美國 多得俄羅斯、中國照住

行走江湖數十年者,必對以下幾句俗語,甚有感受:一、笑騎騎放毒蛇;二、扮豬食老虎;三、老襯頭鱷魚底;四、知人口面不知心……用嚟形容北韓領導人金正恩,全中!呢丁肥仔,肥頭耷耳,眼神並無普京般陰沉、特朗普般兇險、習近平般神秘,但竟然可以揸張「Dee Dee」底牌而活躍三大強國領袖之間,大玩「槓桿政治」,功力少啲、平衡力差啲都唔掂。

大家過去年幾,睇到肥恩同狂特會面,以為北韓好快俾美國佬搞掂,如此,中國的話語權就會全面降低。

其實,有少少國際政治觀察力者皆知,北韓點會「自動剝牙」,將一切核武消滅吖?

北韓為乜「寧要核子不要褲子」去搞核武,正正唔想俾美國欺負,起碼,打爛仔交時,都有幾件武器傍身。

而北韓研發核武,當然有兩位大佬-中國及俄羅斯支援,因在軍事上,對抗美國,必定要搞「三位一體」,就咁簡單!

特朗普以為紆尊降貴就可剝掉北韓所有大牙,太天真了。

其實,在歷史關係、地緣政治及三國發展方面,中俄朝早早你中有我、我中有你。美國打北韓,等於打埋「切肉不離皮」的中國及北面的俄羅斯,想世界大戰乎?

金正恩看似肥嘟嘟、好傻氣,但僅用小小計謀就即可穿梭三位國際大佬中攞盡好處。

呢呢,今天,金正恩又應普京邀請,在海參崴會面,當然要高調俾特朗普知-老友,兩位大佬錫晒我㗎,你想𠱁我剝牙?行遠啲啦!

撰文 : 曾智華

緊貼財經時事新聞分析,讚好hket Facebook 專版