要註冊就要Unlike 新聞資訊幾時開始變得唔值錢?

博客 18:25 2019/04/12

分享:

有留意開網絡睇新聞嘅人,應該都會留意到香港蘋果日報由今個月10號開始實施訂閱制,即係你要登記成為用戶,先可以無限制睇到蘋果日報啲網上新聞。蘋果日報呢個動作,就即引起大批人士不滿,甚至大批人士表示要unlike蘋果日報FB page、delete蘋果日報app。

積臣對於網民反應唔感到意外,因為香港人習慣咗喺網上click一click,就以為得到晒所有嘢,例如音樂、電影、遊戲等,甚至有部分人覺得畀錢嗰班人係笨。十幾年前,上面嗰啲產品可能係好貴,但現今網絡發達,加上新科技好似串流技術,係成本節省下,以上產品已經變得好平,一套YouTube付費電影分分鐘只係10零20蚊,平過你入戲院睇。

本地傳媒收費其實唔係新鮮事,好似信報同香港經濟日報都已經分別收取月費或年費。雖然今次蘋果日報只係採取註冊制,未正式收費,就引起唔少反彈。但其實幾時開始,大家覺得連新聞資訊必然係免費?未有網絡年代時,大家曾經扲荷包、真金白銀買份報紙返屋企㗎。

美國媒體好早發現紙媒末落,收入大減,要轉型網絡媒體,並且實行收費制,支撐公司營運,好似Time Magazine、Wall Street Journal、New York Times等,美國人對此並不抗拒。New York Times因為公司營運改善,其股價不斷上漲。睇返美國媒體做法,佢哋收費制都平過以前報紙價,例如New York Times嘅Basic Subscription,每星期都只係1蚊美金,1年係52蚊美金,換算都只係407蚊港紙左右,其實唔貴得過一餐自助晚餐。

積臣都觀察到,就算KOL請觀眾可以課金支持下,香港人都比其他地方嘅人吝嗇。其實蘋果日報今次事件,或者係一個契機,令市民知道新聞資訊唔係免費嘅,當中都要有人去做,先出到有質素啲嘅產品。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版