商界三大高人逐個數

職場 12:00 2019/03/21

分享:

商界,從來是個鬥智場,沒有符碌的長勝將軍,只有真正具智慧的長勝者。我肥碌多年觀察,發覺有三個人,你無得唔服,因凡出手,十次有九次例不虛發!

商界三大高人逐個數

新鴻基地產郭鄺肖卿(郭老太)

第一位是新鴻基地產的郭老太。若你過去五年跟佢手影,早已執唔少!口講無憑,請大家翻查紀錄,就知老太幾犀利。凡入市回購新地股票(大股東,要公布),次次半年內會升三成。無他,論清楚公司真正市值、狀況及前景,邊個比佢更勁?

長和系前主席李嘉誠

第二位是李嘉誠。佢出貨你接,真係要「祝你好運」!

接超人出的貨前,唔該先照鏡。因若有大水位賺,為乜益你?舉例,佢放中環中心,點解?

好等錢使?當然唔係!而係肯定個市快到頂嘞!你挑戰佢智慧?得,一接就坐艇囉!

邵逸夫爵士

第三位是邵逸夫。凡同佢拍檔及接佢貨者,例必「揼到飛起」。你唔識或唔知,可問問昔日與佢合股做無綫的本地大孖沙,以及曾拍住佢搞收費電視的過江龍幾「天真」,結果交足學費囉!

最近,你可有看見TVB的慘況?2011年,邵逸夫為乜要賣長年獨霸的無記?你以為佢真係想退休?

傻啦!只因佢肯定大趨勢已徹底改變,趁仍有傻瓜出高價接貨,當然笑騎騎讚你叻仔再俾檔嘢你「享受」陰乾啦!

無咁上下閱歷,好難識欣賞三位高人出招㗎(唔好意思,自己讚自己)!

撰文 : 曾智華

緊貼財經時事新聞分析,讚好hket Facebook 專版