咖啡店變自修室 又關土地問題事?

博客 16:30 2019/03/15

分享:

香港人愛飲咖啡,就連連鎖咖啡店都開到成行成市。中學生最緊張嘅2019年中學文憑試喺3月底開始,唔少中學生已經積極備戰緊,所以唔難發現最近連鎖咖啡店一批批攤開晒書本,喺度溫書嘅中學生都多咗。連鎖咖啡店應唔應該畀呢班學生霸住個位成日嚟溫書,成為每年討論嘅熱話。

批評學生嘅原因通常都係「溫書做功課應該去自修室」、「買咗嘢飲又點,就可以坐成日?」「始終係人哋做生意嘅地方」、「長時間霸住個位無公德心」等等。

而學生又會講因為屋企「空間唔夠」、「無書枱」、「太嘈」、「太多引誘專心唔到」等原因,帶到去「土地問題」。

其實大家都可能忽略咗,出現呢個現象,其實有可能係連鎖咖啡店嘅營商策略。Starbucks要將自己品牌變成市民生活嘅「第三個空間」(Third Space),第一個空間係家庭,第二個空間係工作場所,咖啡店就係家庭和工作以外的「第三個好去處」。

連鎖咖啡店要成功做到第三個空間,就要將咖啡店變到更具公共性,即係環境與設施改造、大眾都可使用、鼓勵社交等。以Starbucks為例,就統一用上啡色、綠色及紅色作主調,畀人溫暖之感;用上長方形木枱及圓形木枱,兼顧唔同人嘅需要;提供WiFi、插座等設備。Starbucks唔似港式茶餐廳,店員唔會主動趕客走;唔似自修室,每個人可以隨時隨地放聲交流。所以,去連鎖咖啡店做嘢又點止得中學生,平日已經見到有一班揸住書、揸住電腦、文件喺連鎖咖啡店工作嘅人。

去咖啡店工作又豈止得中學生。

去到呢度,難免令積臣諗起又係「土地問題」,學生自修室每年都供不應求,學生甚至將圖書館只供閱讀嘅座位都用埋,再之後係連鎖咖啡店「搵位」。普羅大眾應該都試過只係想搵個地方吹下水、交流下工作,甚至休息一下,都搵唔到地方,無可奈何都要畀錢咖啡店賺。而連鎖咖啡店亦配合「需要」,包裝成一個商業策略。

每到考試季節,自修室都會爆滿。

唔少人話連鎖咖啡店唔識做生意,任人買一杯嘢就可以坐成日,蝕大本。但睇Starbucks,唔單止唔使蝕,過去幾年毛利率係超過5成,佢賺錢之餘,又賺品牌價值!可能就正如澳門賭王何鴻燊所講︰「唔怕你精,唔怕你呆,最怕你唔來」。

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版