假如可以穿越到10年後 你𠵱家會投資乜嘢？
荷里活喺2000年推出一部電影叫《隔世救未來》，故事講主角用無綫電，跨越時空同後生時期、仲未死於火災嘅老豆對話，最後個仔試圖透過時空對話拯救佢老豆。當中有一幕超有趣就係主角扮成聖誕老人同自己兒時一齊玩嘅好友講咗句咒語—「YAHOO」作為聖誕禮物。無錯，就係美國雅虎公司，90年代曾經係世界數一數二嘅科網公司。
喺現今講求科技創新年代，科網公司只要稍微落後，就會被其他科網公司追過，曾經嘅股王雅虎，今時今日已經成為另一家公司旗下嘅附屬公司，𠵱家輪到Facebook、Amazon、Google等上位了。
積臣曾有一刻忽發奇想，如果喺10年前，你有架時光機，可以去到10年後世界，你估下自己第一眼見到咩社會轉變？最明顯就係每個人都係到篤手機，就算情侶同枱食飯，大家篤手機嘅時間多過吹水交流。係呢一刻，你會諗到投資啲咩？
10年前，大多數人會買5號仔滙豐，因為金融海嘯一擊就將滙豐由高位接近150蚊，拉到最低只得30幾蚊，對好多散戶嚟講，個股價真係好平、好吸引，同時好多散戶對滙豐有好深嘅情意結，相信佢係大到不能倒。10年過去，佢的確係大到仲未倒，但同時無增長。就算你好勇敢、又好幸運係最低位撈到貨，揸到今時今日最多只有一倍回報，我當計埋股息後有兩倍回報，其實每年平均只係得兩成回報。
買滙豐雖然未必蝕錢，但你係錯失咗一生人其中一個最大改變形勢嘅機會。同一時間，蘋果公司食住移動互聯網同智能手機發展，10年股價回報大約9倍，即每年有約9成回報。具體數字，坊間有唔少專業分析，積臣就唔詳說了。
同樣道理，如果𠵱家畀部時光機你，係出發前你會想像到未來10年世界係點嗎？人生唔係好多個10年，錯過咗重要時刻就係咁樣先，積臣覺得年輕人嘅本錢就係可以承受較高嘅風險。
近排全世界講緊5G，預期5G正式推出後，世界會再有一波轉變。5G提供更快嘅網速，同時令𠵱家因為通訊連接技術受限嘅服務及產品可以大幅度改進，例如無人駕駛、物聯網、AI等。大家唔一定有一個時光機睇到將來，但年輕人有嘅係知識同資訊，去認識將會改變世界嘅科技。但原地踏地，乜都唔做，真係講句拜拜先。
電影入面主角嘅朋友最後變成點？佢完成心願，買到理想座駕喇！假如，有一日有一個人畀個咒語你，你會如何處理？
【作者簡介】90後製作公司打雜，熱愛打機，亦愛行山吸收靈氣，希望快啲儲夠錢享受人生。
撰文 : 積臣
欄名 : 積財有計
