【集體回憶】《CO-CO!》休刊 點只係「一個時代終結」咁簡單

博客 17:36 2019/03/01

分享:

近日香港有幾單社會大事,除咗財政預算案之外,就係觀塘裕民坊清場嘅最後限期。不過有對於一眾80、90後最「上心」嘅事,應該就係本地兒童漫畫周刊《CO-CO!》休刊。《CO-CO!》休刊,意味住係咪連動漫呢啲軟性資訊喺本地市場都企唔住腳?

《CO-CO!》係2月28日正式公布休刊消息

曾經最受歡迎嘅兒童周刊

80、90後應該對《CO-CO!》唔會感到陌生。《CO-CO!》1997年創刊,至今已經22年了,曾經係本港最受歡迎嘅兒童漫畫周刊,當年最大競爭對手係《快樂龍》,不過《快樂龍》早係2010年停刊,《CO-CO!》捱到𠵱家,生命力已算係頑強了!

《CO-CO!》最顛峰時期仲有另外出版《別冊Co-Co!》及雙周刊《Super Co-Co!》,吸引到唔少小朋友死慳死抵唔食飯都要買嚟睇。佢最大魔力除咗連載嘅漫畫、提供遊戲和玩具最新資訊外,仲有當年隨書附送嘅玩具精品,好似月暦、海報、卡牌遊戲,仲印埋日本熱門漫畫《四驅兄弟》、《爆旋陀螺》、《數碼暴龍》等人物上去,產生一種「抵買夾大件」嘅感覺,小朋友見到,點會唔趨之若鶩?唔少網民到𠵱家都仲keep住呢啲珍藏㗎。

網民在FB分享《CO-CO!》曾經隨書贈送的精品

進入互網絡時代

喺未進入互網絡嘅年代,小朋友就靠呢啲周刊、雜誌睇最新遊戲、玩具、漫畫資訊。但進入互網絡年代,係電腦度click一click已經好快睇到最新資訊,仲點會等一星期出一本嘅周刊、雜誌?等得嚟「新」嘢都變「舊」嘢了,此為第一個衝擊。

第二個衝擊係進入串流年代,隨着網速提升,𠵱家人人都可以拍片、直播打機、做KOL,透過呢啲渠道分享資訊同個人睇法唔再係難事,仲有唔少人拍片開箱試玩最新玩具,視覺效果同有趣程度又的確係好過雜誌多多聲。

手機嘅興起當然會係另一個衝擊,𠵱家好多小朋友都非常有手機癮,佢哋好大機會話與其揸住一本本厚而重嘅印刷紙本喺街睇。點解唔用手機睇?唔好話《CO-CO!》喇,連日本最大嘅青少年漫畫周刊《週刊少年Jump》都不敵時代巨輪,紙本銷量由高峰期600幾萬跌到只剩百幾萬。當然,受影響又點只得《CO-CO!》呢,凡係印刷文本都極受影響,𠵱家每個人對手機時間仲多過對書本。

𠵱家小朋友非常沉迷手機

其實小朋友對遊戲、動漫資訊需求可能根本無減少到,否則就唔會有電競呢個行業冒出,只係接收資訊嘅渠道改變咗啫。《CO-CO!》嘅出版商正文社回答傳媒查詢時,表示會繼續係FB專頁更新遊戲、玩具、漫畫等資訊,似乎有意集中資源轉型網上。已經有唔少媒體早過《CO-CO!》轉型網上,佢哋絞盡腦汁去搶讀者眼球,加上網絡影片興起,一眾KOL透過拍片去賺取收入,《CO-CO!》轉型網絡究竟係一條出路、遲來先上岸,定只係困獸鬥呢?

最後老土都講句,《CO-CO!》嘅休刊點都係一個時代的終結!

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版