【消失中的維修權】電話愈賣愈貴 自己手機點解無得維修? 

博客 18:45 2019/02/22

分享:

自從12年前喬布斯宣布推出iPhone,帶嚟咗新一波手機革命,手機進入智能化年代,至今仍未有人帶嚟新一波改變。近日三星率先公布咗可以摺嘅智能手機Galaxy Fold,idea係新,但索價近1.5萬港元,真係會有大量棒場客?買咁貴電話,過咗保養期又點算?

手機愈嚟愈貴

近年手機價錢愈嚟愈貴,舊年蘋果公司推出的新iPhone價錢都加咗,其中iPhone XS Max索價近萬港元,更被果粉批評太貴,根本難以負擔。最後市場印證咗蘋果公司定價策略錯晒,蘋果公司要減價促銷。但偏貴的何止iPhone呢,三星S系、華為Mate系、LG V系推出的旗艦機個售價都係不斷提高,但大家嘅手機嘅差異唔大,都係鬥勁啲CPU、多啲記憶體、大啲電量、影相勁啲等等。

索價近1.5萬元的Galaxy Fold

手機壞咗有無得整?

其實大家有無諗過買咁貴嘅手機,過咗保養期點算呢?先唔講壞重要零件,積臣試過以前部電話機背鏡頭花咗,搵官方整都要3舊幾,最近又搵坊間電話維修舖整換Mon,都要收5舊,維修支出分分鐘夠買一部平價嘅新手機。

而且𠵱家電話損壞嘅機會比以前高,你實見過電話跌落地爆Mon嘅例子,你估𠵱家手機仲好似3310咁擋到子彈咩?如果你咁貴買咗部旗艦機,過咗保養就壞,拎去整肯定好貴,加上𠵱家電子產品維修難度極高,未來可能坊間維修舖都未必搞得掂。外國甚至早有手機生產商「有預謀淘汰」(planned obsolescence)一說,指商家特登縮短產品壽命,迫消費者不斷購買新產品。

電器要有維修權?

所以基於各種原因,我哋養成咗電話有問題就索性買過部嘅思維,但咁係極唔環保,而且嘥錢。近年,西方國家開始提倡電子產品維修權,就好似美國加洲,已立例規定商家有責為售價介乎50至99美元嘅電器在3年內提供維修保養,100美元以上嘅電器更可獲最多7年的維修保養;華盛頓州擬立法規定手機要有得換電添。法國都規定廠商須免費維修或更換在2年內購買的產品。

𠵱家香港賣嘅手機基本上只有一年保養,延長保養期好多時都要加錢。保障消費者權益落後於西方國家嘅香港,要成功立法維修權會唔會係天方夜譚呢?

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版