【利市錢理財】與其沒收子女利是錢 不如學理財達人呢招做「富爸爸」

博客 18:30 2019/02/15

分享:

眨下眼農曆新年就完結,小朋友當然係最開心,有賀年食品食之餘,仲有利市逗。長輩交帶落,要等到年十五先好拆利市,因為太早拆利巿會「財散」。不過,小朋友都一於少理喇,梗係希望嗱嗱臨拆開利市,走去買心頭好。

至於家長呢,大多數都唔想小朋友亂咁揮霍,幫佢哋儲起,所以年年都會聽到例牌對白︰「等阿媽幫你儲起佢喇,等你大個咗之後,拎嚟上大學、結婚用」,跟住小朋友好唔情願咁將利市「上繳」,因為唔知有無得攞返。家長最後有無兌換承諾呢……就真係「各處鄉村各處例」喇。

父母話幫小朋友儲起,但其實佢哋點樣儲呢?最熱門就係幫佢哋開個兒童戶口,風險低、回報穩定。但如果喺10年前開兒童戶口,就慘慘豬了,因為10年前係量化寬鬆開始的年代,幾十萬放喺戶口只係得幾蚊息,嚴重跑輸通脹。近年好啲,因為美國加息,有返存息。不過,最近市場消息傳美國聯儲局有意停止加息,唔排除減息添。到時儲蓄戶口剩低幾多息我都唔知了。

噚日積臣睇到一個FB post,有個台灣財經作家分享佢幫小兒理財嘅經驗。呢位作家叫「不敗教主-陳重銘」,陳重銘喺個仔仲細嗰時就幫佢「存股票」(類似定期買收息股,再將股息滾存落去),一點一滴慢慢滾出來的,到個仔升咗大學之後,佢就將個銀行戶口使用權畀返阿仔,作為大學時生活費,話晒有15萬台幣(約3萬8千港元)。不過問題嚟喇,個仔使錢唔手軟,每幾日就幾千台幣咁洗,1個月就使咗1萬台幣(約2,500港元),最後逼到佢要出手嚴管個仔嘅支出。陳重銘又透露,如果個仔少使一啲,佢就可以幫個仔存更多股票,將來得益仍然係佢。

陳重銘分享佢幫兒子理財的經過

故事講完喇,兒子個理財態度固然要糾正喇!但各家長不妨參考下陳重銘個做法,喺小朋友細個嗰陣時就早啲預備,幫佢哋將筆錢拎去投資,滾存落去,作為未來的教育、結婚、置業基金等等。咁個仔大個咗就唔使問「點解我老豆唔係李嘉誠」喇。有時所謂的「富爸爸」、「窮爸爸」,只係一指之差,就天淵之別。

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

 

【延伸閱讀】那些年派6千錯過了買騰訊 今次4千可以做咩?

【延伸閱讀】4厘息新春利是股 北水都持有

撰文 : 積臣

欄名 : 積財有計

緊貼財經時事新聞分析,讚好hket Facebook 專版