【手機支付】從返內地度歲一事 體驗內地手機支付有感

博客 17:42 2019/02/08

分享:

農曆新年都會有大批香港人返鄉下過節、探親、度新歲等,近幾年中港最大嘅發展差異,可謂係金融科技,特別係Mobile payment(移動支付)。內地「一機在手,全國通行」的情況已流行咗幾年,但無內地手機錢包嘅「港燦」,更會感受到嗰種落差,最重要係到畀錢嘅時候係非常不方便。

一機在手 全國通行

基本上喺內地每個城市嘅餐廳、服裝店、公共交通工具售票點、搭地鐵、住宿等都可以利用手機銀包付款,甚至小店,例如雜貨店、零食店、街邊小販等,都已經支援手機支付。積臣見過唔少自動售賣機只支援掃QR Code買飲料,無內地手機錢包嘅香港人,就請稍移玉步,去搵間收現金嘅便利店或雜貨店。

爭請客都要與時並進

新年嗰陣要同親朋好友食飯,免不了要爭住請客,但𠵱家都已經唔係鬥快攞銀包出嚟,而係邊個最快開到手機錢包出嚟,揸住現金慢慢數嘅港人即時慢人一步。積臣更觀察到店員往往鍾意收手機錢包多過收現金,可能係一來手機支付唔使逐張數,二來唔怕收到假錢,整個付款過程亦加快咗。

綫上服務綫下生活嘅結合

好多時香港網民討論手機支付時,往往只係比較邊一種更廣泛使用、邊一種付款過程速度更快。而內地除咗支援手機支付嘅商店較多之外,有一個point好少人討論到,就係綫上服務綫下生活嘅結合,即係綫下生活需要解決問題,透過綫上服務就可以滿足到。

用微信支付舉個例,你因為行程改變,要臨時喺當地住一晚酒店,但臨急臨忙book唔book得切呢?只要你打開微信支付,入便就有同程藝龍可以訂酒店。住咗入去之後,發覺酒店提供的生活用品不合心水,你一樣可以打開手機錢包,用美團外賣團購牙膏牙刷,貨品好快送到上門。夜晚突然肚餓,同樣都係美團外賣,幫你搜尋有關食肆,送宵夜上門。早上起身要趕搭高鐵,用滴滴出行Call車,好快有專車到酒店樓下,直接車你到車站。

內地微信錢包內有不同的服務可使用

香港正等待「它」出現

所以,喺內地擁有一個手機錢包,基本上足不出戶已可解決生活上嘅需求。而於香港,主流仲係八達通卡,雖然Google Pay、Apple Pay、Samsung Pay等國際巨企嘅支付業務都已先後攻入香港,不過依然無一個好似微信支付同支付寶一樣,一個錢包搞掂所有事。就算香港版微信支付同支付寶大灑金錢做宣傳,但都未做到內地錢包咁方便,一APP就齊第3方服務。

不過呢個「它」究竟可唔可喺香港生存,其實好睇香港人嘅使用習慣,唔可以否認係好多香港人仲係鍾意畀或收現金,多過使用手機錢包。而且本港電子支付競爭大,除咗雄霸多年嘅八達通,仲有信用卡加上上面提到嘅各種電子錢包,本港電子支付市場仲係群雄割據嘅局面,幾時先至有強者跑出?真係好難講咯。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版