【派錢$4000】那些年派6千錯過了買騰訊 今次4千可以做咩?

博客 18:33 2019/02/01

分享:

等咗成年咁耐,上年財爺陳茂波宣布派錢4000蚊的措施,終於係今日2月1日可以交表,不過交咗表據聞最快都要等到4月先有第一批人收到錢。今次同2011年果次派錢,足足少咗2000蚊,今次4000蚊究竟可以做啲咩?

今次想要拎足4000蚊,幾乎係「過五關斬六將」,坊間個個都話,只有讀緊書嘅學生或者退休人士先可以攞足4000蚊。不過積臣想先要問一問大家,仲記唔記得上次拎咗6000蚊之後,用咗喺邊度?我諗好多人都唔太記得,話晒都8年前,當年積臣身邊嘅人最後都用喺食、玩、買或補助日常生活支出。

當年$6000你用咗去邊?

今次派錢少過上次,加上通脹,想複製2011年經驗都唔易。但今次買唔到iPhone,但最少可以買到小米最新果部Mix 3;去唔到日本旅行,都可以去台灣旅行(至多住平啲喇!);或者當補助保險供款、交學費等。自從出嚟工作之後,都有諗返當年點解唔將6000蚊再加多啲錢,拎去買一手騰訊(2011年一手騰訊要萬幾蚊,其後佢股價拆細過),直到𠵱家個回報真係相當可觀。不過,有早知就無乞丐喇!

利申先,積臣今次係合資格去拎,不過就拎唔足。今時今日,4000蚊更加難買到啱心水股票,所以今次積臣心入面有兩個plan︰第一、拎去做月供股票或強積金特別自願性供款嘅本金,兩者共同性質就係利用每月供款,達到複利效果(複利效果可以睇返之前寫嗰篇),之後每月供多幾百,當係啟動自己嘅月供投資計劃。第二、呢個方法係「邪惡」啲,小朋友唔好學,我會買兩手小米股票,以今日收市價10.44蚊計,兩手唔計交易費手續費即係4,176蚊。或者有人會話︰「呢隻嘢債務多,而且仲係負現金流,害人咩!」正所謂風險高回報高,積臣今次係抱住「搏一搏,單車變摩托」嘅心態,期望佢變身另一隻騰訊,話晒佢由做山寨機,做到𠵱家上埋市,據IDC統計,2018年小米更成身全球出貨量第4大手機品牌。萬一之後小米真係不濟,我唯有當去少一次旅行,食少幾餐自助餐喇!

最後都要戴下頭盔,以上並不構成任何投資建議,僅提供作參考用途,本人並無持有任何小米股份。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版